美國聲稱收到風俄羅斯最快於明天（16號）對烏克蘭開火，叫人快點走，不過就連烏克蘭話事人自己都話唔知道，但佢再一次明確表示加入歐盟同北約仍是首要任務，烏克蘭又話有富商包機逃走。市場最唔鍾意不確定性，市場當佢打，問題只係打幾耐，上證跌了1％，港股一開市已失守上周五黑期價27000點後，再跟外圍跌落去，全日跌350點，成交都係少，跌市成交1100億，似冇乜人買多過好多人走貨，始終大户12月同1月都係下面建左不少倉。北水淨走近24億元，主要係沽出中移動（941）、比亞廸（1211）、同吉利（175）。

恒指低收24556點，100天線24400仲頂得住，指數仍處正常調整波幅區域，等機會開邊。美期於港股收市後立即插300點，外圍恒指，夜期都跟跌。大股中，近期升得多的中移動（941）連續3日陰燭回軟，近期上升動力主要係炒股值收復，同埋分司回購，以佢去年係3月25日公佈業績，今年都會差不多，業績前一個月係blackout period，公司不能回購，所以炒呢個概念最多得10日左右。其他股份中，科網股跟納指弱，內房同物管股炒一兩日後又突然縮水。

中國乘聯會公佈1月份汽車銷售量下跌，長城（2333）亦指1月公司銷量同產量都下跌19％。

戰雲下美股反覆，道指不斷下試低位反彈，最後跌170點，納指則冇起跌，紐約期油抽上95.5美元，現貨金1875美元，有大行指俄烏若開打必引起能源價格上升，供應鏈斷裂，影響全球經濟。