港股於外圍反覆同加息陰影下，恒指都還緊守24900水平收，仍算不錯，唯美股上周五再跌逾500點，兩日共跌了千點，外圍恒指都跌到落24700點水平，100天線企係24400水平，10同20天線即將升破100天線，希望在大市鞏固中為市況帶來點支持同上破動力。

內房股近期有回暖之勢，好多民企都得到銀行放水，或可延長還款期，及時雨應急，另外好似國企的中海外（688）、潤置（1109）財政健全，其他民企如出事，仍可以有機會低價買入資產。不過上周五都有一系出事，就係正榮（6158）及其物管（6958），下午突然有傳還唔到債，兩隻股價即刻跳崖下跌，埋單都跌近6成，搏內房點都係買大比細安全好多。

密歇根大學2月美國消費者信心指數初值為61.7，創逾10年最低，市場預期為67.5。美股上周五本來早段仍穩，都係受加息通脹因素影響，市場都擔心俄烏局勢會在冬奥後再升溫，所以中段後又再跳水，道指同納指分別再跌500同400點，市場最唔鍾意就係不確定性，美股都仲處於反覆期，可能要等加一，兩次息後等市場習慣了息囗上揚，返回基本因素，由經濟同企業盈利表現去决定後市走向。白宮向晶片業警告倘俄烏開戰，晶片業供應鏈會受干擾，晶片股受壓，其中最傷係AMD跌10％，NVIDIA跌7％。

美國10年債息跌穿2厘，最新報1.94厘，恐慌指數升番上27水平。戰雲憂慮下紐約期油升上93美元，現貨金亦抽上1860美元。油價升又拖累通脹，一環扣一環下都幾麻煩。

避險令美滙升上96.03，歐元跌0.68％至1.1350，日圓有避險概念，上周五晚一度由116升到115，其後去番115.45。人民幣6.3655。