2022年10月4日

聯儲局議息結果同鮑威爾言論震散全球股市,聯儲局議息後明確表示,最快3月初加息及結束減買債,鮑威爾會後講不排除每次會議都加息的可能性,今年好似仍有6、7次會議,即係最多要加厘半,又話需要大規模縮表,聯儲局現時資產負債表8、9萬億美元,好像一個大肥佬要瘦身般,日日做運動,跳上跳落,真係地板都震散。港股於內外夾擊下,美期早上固然跌,連A股都散埋,恒指裂囗低開24000點下面後,反覆向下,最多跌700幾點,散過爛雞蛋,尾市反彈上23800收,只屬苦中一點甜,未上回去24000點且企穩都未言安心。 

紅杉資本持有美團(3690)5.7%股權,若要減持就要申報,紅杉宣佈將派價值70億元美團股份給基金持有人,完成後紅杉持股降至4.70%,換句話在市場減持不用再公佈,呢個部署已令前晚中概股係美國ADR時段下跌,昨日就梗係進一步向下,美團當然跌最多,跌了7%,巴巴(9988)再創在港上市新低,生科股同教育股繼續跌。 

美股繼續大波幅市,道指升600點後升幅歸零,納指跌逾1%,Tesla業績雖然靚,但證實今年冇新車款推出,即插11%。昨日鮑威爾都有表示,股市和資產價格下跌大不會係貨幣政策既主要考慮因素。 

美息預期升溫下,美滙升至97.3,歐元跌1%至1.114,日圓去到115.45,10年債息1.81厘。