美股連日大波幅上落，港股昨日尚算企得穩，平開後指數一度抽上，去到24500點10天和100天線接近重疊的位置就有阻力，收市只升46點，收24289點，成交1300億元。大市於24000至24500點上落，向上向下都被幾條平均線夾住，市場等昨晚聯儲局議息結果，放鴿無望，冇咁鷹已經執到，如果佢話3月會加50點子，市場多數會震多一震。至於港股自身因素，明天已經係期指結算，相信大戶轉倉都差不多完成，再破100天線後可再向好。 

藍籌股個別發展，騰訊（700）、中移（941）、平保（2318）、滙控（005）做好，但係生科股又遭洗倉，藥明系兩大股份分別下跌7同10％，信達（1801）跌10％，其他生科股都冇隻好睇，教育股係另一個災區，中教（839）急跌3成。 

美聯儲局議息後維持利率不變，表示3月結束買債後，最快會在當月加息，更暗示會大規模縮表，結果美股由最多升500點後逆轉至跌400點，埋單跌129點，納指打和冇起跌，恐慌指數VIX本來回落，尾市又再恐慌起來。 

聯儲局鷹鷹地，債息又抽上，升上1.84厘，美滙升上96.48，其他貨幣全面回軟，歐元1.1236，英鎊1.3457，日圓更回到114.75。紐約期油倒升，最新為87.27美元，比特幣37000美元。