2022年09月28日

美股前晚單日轉向,雖然算是出了針底,但係難以話見底,高低位計,今次跌浪道指已經跌了4000點,納指都有3000點,美股波幅已經放量,幾時見底已冇得估,起碼要等到波幅收窄,道指現在勉強仍在大型喇叭區內,前晚大穿底後收番上去,仲未安穩。今年係預期的加息縮表年,究竟疫情要搞幾耐,美國經濟及股市會否受加息影響,通脹何時受控,太多未知因素下,美股今年都可能會大波幅走上落。 

港股未能承接美股大反彈勢頭,因開市前美期於亞洲區時段已經又跌2、3百點,加上上證又跌近90點,國內冇乜特別消息,可能係地理環境近俄烏關係,影響之下,港股當然冇運行,中概科技股隔晚已經冇跟足納指反彈,屬跌市的領頭羊,另外保險股如平保(2318)、友邦(1299)跌幅都較大市多,係得內銀股頂得住,至於股份升跌比例更醜樣,去到1:3.5。 

上海石油化工股份(00338)公布預計截至去年底止年度歸屬母公司股東的淨利潤約為19.28 億至21.28億元人民幣,按年增加2.07倍至2.51倍。 

美股波幅仍未收窄,國際貨幣基金組織調低今年經濟增長預期,早段一度跌逾800點,其後又拗腰上,只跌66點,不過納指仍跌逾300點,科技股繼續殺股值,恐慌指數VIX續升,資金流入債市,債息微跌。美滙95.97,俄烏局勢令歐元中段一度下跌至1.127,今早重上1.13。紐約期油回升上85.33美元,比特幣37000美元。 

外圍恒指今早回升150點至24400水平。