俄羅斯同烏克蘭局勢緊張，Netflix 上季同今季客戶增長都遜預期，股價上周五跌逾兩成，其他串流平台股份都有壓力，俄羅斯又唔比玩比特幣，比特幣急挫，最新跌到36000美元水平，係一環扣一環的連鎖效應下，美股上周五進一步下跌，且尾段跌勢幾急，道指跌450，納指仲傷，跌380點，跌幅2.7％，去年7月同10月低位14180點一下子就穿埋，短線都冇乜位睇，勉強要睇就係去年5月低位13000水平，依家搏反彈，止蝕又遠，情願等佢轉勢行逆轉先買。 

港股上周五本來都強，跌二百幾後倒升番上黎，頂得住，但係夜期時段又再跌番落去，外圍恒指隊到落24500水平，剛好跌穿100天線24603，咁就要睇下今日港股腰力有幾勁，如果拗得番上去24600上面，或者跌幅收窄到得2、3百點都已經好叻仔。至於板塊方面，熱錢仲係大股中遊走，綠電及炭中和概念股份繼續調整，反而見部份內需同資源股有資金買入。今早美期回升150點，而外圍恒指跌幅亦收窄至220點，最新為24680點。 

美10年債息回落到1.76厘，紐約期油一度跌穿83美元，其後反彈上85.14美元，微跌0.5％。耶倫為通脹降溫，指出若疫情受控，預期通脹會在年底回到近2％。美滙95.64，日圓升上113.68，歐元，英鎊微升，人民幣續強，最新報6.3414。