昨日日間時段美期愈跌愈多，最多跌成500幾點，以港股近期的弱勢，又點會避得過，距年結只得不足兩星期，要保住今年全球表現最差的地位，低開幾十點後即散落去，埋單跌447點，藥明（2269）同李寧（2331）跌愈4％，比亞廸（1211）跌5％，跌市中，北水續流入。昨日所見，一眾今年升得多的股份都有好大沽壓，不排除有基金睇唔通前景，年底前沽貨鎖定今年利潤。而二、三線股又有一個小股災，佳兆業（1638）復牌，仍未有還錢方案，內房股又受壓，風眼股融創（1918）跌了18％，其他如風電股、火電股、氫能股、發電儲電設備股，以及電動車組件等相關股份都被洗倉。講番大市，根據數據顯示，恒指甚少於12月做出全年低位，上一次已經係1994年，接住港股於95同96年都係上升，到97年才爆破，現時恒指下一個支持係由2016同2020連接起既上升支持位，現處於224至22500點水平，希望真係見到底。 

外國新變種病毒繼續擴散，德國、奥地利和荷蘭開始限聚，美國已有43個州已有確診，市場開始憂慮聖誕新年狂歡後患者數字會急升，從而引發起更大規模既鎖國鎖城，市場又炒避險，有錢流入債市，10年債市曾低見1.354厘，最新為1.42厘，復甦憂慮下，紐約期油跌4％至68.23美元。 

至於美股，現貨時段承接着昨日美期跌勢，三大指數都跌約1.2％，道指最多跌700點，尾市收窄至433點，納指跌188點。航空和旅遊股捱沽。美滙持平，報96.51，其他主要貨幣變動不大，人民幣6.3827。 

最後祝大家冬至快樂。