恒大（3333）危機再度發酵，有傳話將會破產，雖然公司曾否認，但已經冇人相信，加上下午更有傳政府已派人進入恒大公司check數，恒大6月銷售760億元，8月只得一半，380億元，收入少左，冇錢還債還息，賣資產又冇進展，市場驚事件及其連鎖反應下，昨日拖垮港股同A股。A股連日強勢，昨日上午仲頂得住，午後終於頂吾住，跌逾50點，A股近一個月已升左320點，回50點可視為調整，但係港股就慘，今年係成熟市場內算是表現最差的一群，昨日再跌300點，支持再失守，又跌番落去個低位區域橫行格局。 

恒大危機陰影下，除系內三間公司股價急跌外，更拖累一眾高負債既內房股，融創（1918）跌11％，碧桂園（2007）跌8％，其債價亦受壓。其他負債率相對較低既公司如中國海外（688），華置（1109）則跌幅較少。 連鎖效應亦牽連到內銀和內險股，前者憂慮受內房壞帳影響，後者則憂慮保險投資在內房股而蒙受大幅虧損，特別是在恒大系。 

商品期貨價格回落，一眾資源股借勢回落，當中煤股跌幅最少，部份新能源股都有沽壓，呢兩日留意既股份只有創維（751）隻可以逆市向上，其他都跟大市下跌，唯有等個市跌定再部署。 

美國消費物價指數按年上升5.3％，較上月回落且付預期，通脹壓力未有預期般嚴重，美息回落至1.29厘，蘋果股價在iphone13發佈會後無甚刺激，美股由升轉跌，道指跌292點，納指跌68點。美匯一度下試92.33，今早重上92.67，紐約期油企穩70美元上，比特幣47000美元。