2022年09月28日

港股為了穩奪今年全球表現最差股市,噚日係11月場外結算日最多跌677點,埋單跌377點,創今年新低。美期於日間由升轉跌,中午有消息指美國藥廠MRNA表示現有疫苗不足以對付Omicron,而新變種病毒疫苗研發需時,澳洲同日本又都有新病毒確診個案,美期午後最多跌400幾,又拖冧埋港股,但係國內A股就企硬,上證升一點。

京東(9618)跌逾3%,旗下既京東物流(2618)再創上市後新低,收24.7,騰訊(700)尾段跌幅收窄至只跌3元。新舊能源股仍然係強勢板塊,大唐新能源(1798)同東氣(1072)跌不足1%,若大市企穩,唞一兩日隨時又會爆過。

香港的元宇宙概念既股份當然首推係騰訊,其次聯想(992)昨日都逆市升,其他趁勢表示會搞元宇宙的股要就唔好講,再數應該只有舜宇光學(2382)同安捷利(1639),後者兩大股東都係國內元宇宙概念股份,昨日一棍上,升近1.68阻力,破位後量度升幅可見2.3元,唯現在市況唔好,打個折應該可見1.9至2元。

鮑威爾係聽證會突然表示有意加快結束收水,本來美股早段跌幅一度縮減至200點,佢一講後,美股又再插水,結果道指和納指分別下跌652和245點,美期今早回升,納指期貨反彈0.5%,而外圍港股則企穩,可能已經先跌為敬。

疫情影響下油需求的憂慮和拜登表示會繼續釋出戰略石油儲備,紐約期油5%至67美元。鮑威爾突轉鷹,美10債息回落至1.45厘,美匯一度抽上96.5,最新報95.91,避險下日圓升上113.22,人民幣6.3671。