2023年09月29日

港股升跌真係要睇住人民幣同國內股市升跌,恒指噚日低開18000樓下,一度睇嚟無力反彈,中午內地公佈上月M2新增1.36億元人民幣。預期1.275億元,好過市場預期,人行亦強調人民幣匯價穩定可控,晏晝返嚟A股升幅擴大,而人民幣亦由開市低位7.36回升到7.3水平,港股亦跟隨反彈,但力度就未見好強,加上美國星期三晚就公佈上月通脹數據,未來兩日可能都鎖住喺18300(10天同20天線水平)同埋前低位17573之間上落。

恒指重上1800點收,成交1200億元,科指果然下試4000點後見有初步支持,回升上4083收,微跌8點,幾大科技股個別發展,騰訊(700)、美團(3690)、快手(1024)少少地都可以逆市升,兩隻電商巴巴(9988)、京東(9618)就因同為電商嘅拼多多被沽空機構招待,分別下跌3同2%,前者加上出現人事變動,本身係阿里雲揸弗人嘅張勇又離職,都會怕原先1+N嘅分拆又一拖再拖。

大市另一焦點就係本地地產股,一向被譽為本地地產一哥新鴻基地產(016)收入同盈利都未符合預期,主要因為樓盤銷售毛利率大幅下滑,加上滙豐銀行調高按揭封頂利率,大行都預期公司未來派息會下降,股價大跌一成,以往差不多股災時新地先會咁嘅跌幅,當然其他地產股都難免跟住跌。

噚日生科技股炒起,收市後信達生物(1801)擬35至36元配售6800萬股,集資最多25.5億元。

美國十年債息高企4.3%,美匯回軟至104.6,日圓回升上146.72,皆因日央行行長表示有機會結束寛鬆政策。人民幣今早開市前報7.3。

Tesla被大摩提升估值至400美元,股價升10%,帶動納指升1.1%,道指升87點,中概股指數升1.1%,外圍恒指仍維持18000水平上落。