內地上周四公佈8月份進出囗數字，以美元計，上月進出囗下跌8.2％，進囗跌8.8％，出囗跌7.3％，雖然都較預期好，仲係顯示經濟活動喺度收縮緊。人行連日逆回購，希望為市場提供流動性，而內地多間劵商亦喺今天起下調保證金比率，但市場信心仍然薄弱，上證A股又跌近3100水平，頂咗幾日嘅十天同二十天線一齊失守，既然個市要跌，不如放棄無形之手，快啲到底，可能仲會有啲生氣。環顧環球其他主要股市，美股反彈後又再落過，市場同官員用息口控制大家情緒，一時又話要再加息，一時又話冇再加空間，道指又再測試3月到依家嘅上升支持同100天線（依家喺34260），上月曾下試，守到就出反彈，睇下今次又如何。

國家當前嘅問題最大係內房債務，以現時公佈嘅政策只可以吊命，睇以往世界嘅大型金融危機大多都係當地政府包底拯救先有轉機，阿爺暫時未有呢個意向，出事內房可以復牌估計希望佢哋可以喺資本市場集資自救，拖得就拖，而近日大行都警示內房炒高後又會有公司可能會借勢市場抽水，但市場又會有幾多資金肯承配這呢類高風險投資又存疑。

港股喺突然嘅長假期前一下就跌穿十天線，又開始玩慢落，呢種市況最消磨鬥志。科指正式跌穿4160預設位，同大市一樣走勢轉弱，下面要睇到差不多4000點左右。噚日市傳高領資本預留幾十億美元買中資股，結果市場都冇咩反應。騰訊（700）250天線喺318，呢個平均線今年都未穿過，最差嘅就係美團（3690）同京東（9618），兩隻都跌到上月低位。華為新機令市場揣測中芯（981）晶片技術提升，反怕成為下一輪制裁主角，噚日跌7.6％，另一邊就傳話內地禁止政府官員同國企員工用iphone，Apple 股價下跌，口水戰冇問題，最怕又玩相互制裁升級，兩敗俱傷。周五晚又傳出巴巴（9988）分拆合馬鮮生因市場估值未，同埋公司原先估計嘅百億美元，可能又會暫停。另外美國沽空機構Grizzly Research 就指拼多多（PDD）嘅海外人氣電商Temu入侵逾億美國用戶手機竊取個人資料傳送到大陸嘅風險，中資股嘅金龍指數兩晚合共跌近咗5％，亦帶動外圍恒指跌穿18000點，巴巴折合約88.3港元，京東127港元，

美十年債息4.26厘，美匯105.06，日圓14708，離岸人民幣貶至7.365。