上證股市升一日就軟，證明只係反彈市，上星期一內地減印花稅，A股開3215後一支大陰燭跌到低收，圖表上極為難看，若未能收復成支下跌陰燭，上證都不會有升市。

港股其實都一樣，股民話港股只有跌市同上落市，某程度上都冇錯，星期一嘅升幅噚日就差唔多完全蒸發晒，恒指下跌387點，收18456。澳洲噚日繼續維持息率唔變，澳元即插水，間接拖累資源價格同人仔走勢。港股真心差，美元升，人民幣日中又回到7.3水平，對股市毫無幫助，日前大成交都係因指數換馬，結果噚日成交只得千億元，唯一可以安慰自己嘅係跌市成交縮，都算阿Q精神。恒指升唔穿50天線，更諻論挑戰更高位置，噚日講嘅185至18600一下就失守，港股就係咁，高追嘅多數出事，依家短期嘅上升通道已經破壞咗，除非今日即刻逆轉，否則再跌穿10天線後反彈又可能告終。

科指跌100點，4160要守住先有得幻想，華為新手機出台即成熱話，粒晶片有驚喜，國內排大隊，對手小米（1810）即被掟貨，跌6.6％，騰訊（700）有回購都未有力，京東（9618）低位橫行，冇動力。

內房表現兩極，大的中海外（688）同華置（1109）隨大市下跌，但債台高築嘅就繼續炒，融創（1918）又重新被納入港股通，再升25％。上周碧桂園（2007）以股還債予建滔，配股價0.77，噚日收市1.01計，已升咗三成，債權人收到股票後，除收到欠債後，仲有利可圖，可能會成為其他內房借鏡，若股價穩定唔差太遠，債主可以套現，債仔又唔需動用現金還債。

美國假期後復市，油價升，可能有礙抗通脹，美股跌195點，納指只微跌10點，美債息又上，十年債4.25厘，美匯升至104.78，澳洲維持息囗不變，澳元噚日急跌逾1％，最新0.637，歐元1.073，美元兌日圓升上147.6，遊日又有平yen換嗽

喇！

紐約期油升上87美元，現貨金回落到1925美元。