港股上星期五打風下休市多一日，外圍股市就變動唔大，美股星期四、五兩晚一齊計接近冇起跌。美國勞工部公佈8月份非農職位增加18.7萬個，較預期好少少，但呢啲只係初值，過去大半年都會喺往後日子向下修定，七月份亦由18.7萬個下調至15.7萬個，加上失業率亦上升至3.8％，所以美國就業市場應開始慢慢放緩，不過美十年債息就企穩4厘樓上，最新報4.18％，而FedWatch則顯示聯儲局今個月息率不變機率升至9成以上，而今年再加25點子機率就由兩星期前嘅50％降至34％。

加密貨幣上周中反彈一日後就立即回軟，比特幣26000美元水平上落，現貨金重上1940美元，加上美匯未因加息機會減退而回落，反而重上104樓上，直迫250天線104.55，或者反映市場有多少risk off，歐元失守1.08，最新報1,0776，而日圓就重回146。

港股喺突然嚟嘅長周末假期前表現反覆，20天線得而復失，一轉即逝，大市欲借消息反彈，但力度就欠奉，科指連續兩日高開低收，大科企業績已經公佈咗，未再有新消息刺激，百度（9888）有業績同文心一言可公開使用下支下，上升最具貫注力，早前強勢嘅快手（1024）就冷卻咗。

內地8月公佈嘅製造業PMI49.7，較7月升0.4，但仲係連續5個月收縮，非製造業為51，預期51.2。上星期四起國家每日都有些少政策公佈，包括繼廣州後上海、北京、重慶等幾大城市都開始認房唔認貸，人行亦將首期下限降至兩成，希望穩到樓市，成效如何要再看。銀行存款利率一年期減10點子，兩年期減20點子，三至五年期減25點子，人行再出招挺人民幣滙價，今個月15日起，下調金融機構外滙存款準備金率兩個百分點，由現行嘅6%降至4%，市場估計措施會向市場釋放160億美元流動性，人仔一度彈到上7.25，今早開價前為7.27。阿爺措施令ADR嘅中資股指數上升3％，巴巴（9988)約93港元、百度（9888）143港元，外圍恒指升上18500水平。

不過噚日我哋嘅波叔就話減印花稅未必可以令港股成交多起來，睇吓會唔會令港交所（388）同港股都走軟。