國家上星期意外減中期信貸便利（MLF）15點子，大家都預期好快會降LPR（貸款市場利率），結果噚日LPR只減一年期10點子，差過市場預期， 市場唔收貨亦對阿爺救市缺乏信心，減LPR力度唔夠，亦對囗號式救市而缺乏實質行動已開始唔耐煩喇，美元對人民幣又升到上7.33，國家未肯大力救市估計某部份係怕影響人民幣加快走弱，其實救同唔救人民幣都係弱，不過市場可能最擔心嘅係國家知道可能再有狀況會有更大件事，可能係中植系惡化，或者可能係有新爆雷事件，最後或最強的招數留以有待，投資市場係咪興旺，投資者信心極為重要，依家就係信心最低迷嘅時候。至於樓市問題，預售樓花就一定冇人吼，尤其係民企內房嘅樓花，怕收不到樓，至於二手市場，減價都未必有人買，所以減息嘅刺激短期肯定冇咩大作用。

上證指數再跌近40點，信心市下咩支持位已經唔太重要，到咗可能只觸發到反彈，但要轉勢暫時仍未看到，以2019年初疫情前低位起拉上嚟，初步支持在2980，再落就係舊年嘅雙底2860至 2880。

港股亦都冇一塊好肉，再跌逾300點，成交唔多，冇人敢入市，今個月一號高位20331，已累計跌咗2700點，已令好多人心死了，同上證一樣，信心市看支持位只可以作參考，勉強只可以話舊年十一月兩個針底，約喺16800左右，與其估底不如等指數企穩先再諗。

講開恒指，上周末被剔出嘅碧桂園（2007）完成歷史使命，期內股價跌9成有多，恒指服務公司以一向以市值決定成份股變化，跟住又將成份股由50隻增到80隻，令好多唔係話好優質同穩健嘅公司可以入到指數，而股份亦差不多以最高位入指數，跟住就下跌，到唔夠市值就踢出，周而復始下恒指長線邊會有升浪。而我覺得問題最大嘅就係如果打工仔嘅MPF係投資港股或恒指嘅話，就要被迫跟住低位沽出，仲要冇仇報，所以選擇MPF時真要三思。