美股上周五雖然低開高收，道指回升25點，早前預期道指穿35000就會回落1000點到34000水平，其實跌幅只係3％唔到，只屬輕微調整，上周五最低見34265後反彈，勢頭仍然係落，依家先睇100天線34040，同埋6、7今月兩個底位33700左右。納指則繼續跌，納指100最大支持約14300水平。芝加哥波動指數升到上17，市場係有啲避險，十年債息4.25厘，美匯103.43，日圓145.5，而人民幣7.3弱方徘徊。避險下加密貨幣下跌，比特幣跌至26000美元。

中資股繼續走弱，金龍指數下跌3.5％，部份追回港股星期五跌幅，但夜期繼續弱，跌100點，巴巴（9988）ADR跌至約86.3港元、京東（9618）130元、百度（9888）123元，港股上周一大支陰燭跌穿18000點收，早前睇前低位18044為今年浪底已證實睇錯咗，星期四反彈後星期五立即令所有彈幅歸零，今個星期就要睇17700係咪守得住喇。

上周五收市後滬深交易所宣佈將A、B 股交易費降低3成，暫未有提到印花稅，中證監亦會研究降低經紀業務佣金收費率，或者對內劵商有多少影響。

內房問題周末有任何消息，碧桂園（2007）被踢出藍籌股，但就繼續有企業公佈駭人中期業績，遠洋（3377）早前已發盈警，落實中期虧損183億元人民幣，禹洲（1628）就發盈警料中期60億元，融創（1918）預期蝕150億。恒大（3333）上星期五根據美國紐約法申請破產保護，並唔表示集團一定破產，只係境外債重組下必需嘅法律程序，幾年前瑞幸咖啡同滴滴都曾試過。有行內人話有機會恒大同境外債權人嘅商討有進展，債權人衡量後有機會選擇有幾多攞幾多，所以恒大先申請破產保護令，保護剩餘資產。

小鵬（9868）公佈上半年股東應佔虧損同非公認會計準則虧損分別為51同48億元人民幣，上半年按年交付量減少4成，集團預期小鵬第三季交付量會按年上升最多32至38%，而明年底可實現整體成本下降25％。