16年前嘅噚日港股大奇跡日，16年後嘅噚日仲有少少餘威，恒指跟夜期同外圍低開至18000點，低見17900就迅速反彈，收市只跌2點，成交突破千億元，上證指數亦由低位回升40點，收3164，升14點。

其實外資一向都持有唔多中港股票，除某啲因政治因素放棄中港股市外，多數係對中港太多政策市冇信心，兩星期前碧桂園事件開始發酵前，外資對沖基金因持倉唔多，所以操作為中性，碧桂園爆雷後部份對沖基金開始net short 中國同香港，中國佔6成，香港4成，沽空港股一個星期已跌咗一千點，四日出咗三個下跌裂囗，聽講噚日恒指一跌穿18000點就觸發到佢哋平倉，港股亦得以反彈，未有收穿今年低位，亦即日回補咗噚日嘅下跌裂囗。至於恒指係見底抑或是跌市嘅反彈，就要再睇，若果短期能重上18500企穩，再回補星期三嘅下跌裂囗，或者今日能再升多二、三百點，令恒指周線圖上出現長腳，則大市有望企穩，但要升就需要更多消息同成交支持了。

科指開低後即上，自五月底起仍維持到一底高於一底的形態，恒指同國指就失敗了，內銀、內險同電訊股升唔起，恒指全靠科技股帶起，全部低開高收，噚日都提到以預期市盈率十幾至二十倍嘅大型科技股計，如果唔係姓「中」，一定會有好大嘅估值上調。

人民幣連日下跌，噚晚彭博引述消息指中國要求國有大行加大對外匯市場嘅干預力度，減少大幅波動，言語間人民幣接近7.35應該中咗國家的關鍵位。人民幣由7.34回落到7.3樓下。

美十年期債息連升多日，最高升至4.32厘，最新為4.27厘，美匯103.41，日圓輕微反彈到145.8。美股如預期繼續回落，納指先行，穿20天線後強調要觀望，道指穿了35000點嘅圓頂都慢慢向下，暫唔估底，等出現訊號逆轉，因中國等環球經濟不確定性上升，下半風年向似避險多。