外圍股市跌，中港股市一定跟足，弱勢嘛，上證指數喺下面3140的支持位上反覆，無力彈。港股一開就跌穿18500，每個支持位逐一打跌破，依家已好簡單，下面只剩低18276（7月7日低位）同18000點，早排仲相信5月底低位18044係調整底部，如果冇碧桂園（2007）事件或者都可守到，當然睇錯就係睇錯，若然18000失守，終極支持就會落到調整0.618嘅17700，如恒指出現大成交（1300億或以上）下重上18500，即下面有人買貨，短期或可能會跌完。相對恒指，國指離7月7日低位仍有100點，科指仲強，當時低位係3850，現價計噚日仲有200幾點喺手。科技股中，騰訊（700）、京東（9618）、巴巴（9988）、百度（9888）預計市盈率都是10幾倍，龍頭股來講真係算平，同一類股份若非中資股最少高50％以上，搏下市反啫，呢類股份都會係首選。快手（1024）連日表現較差，皆因早前騰訊都喺派成績表時宣佈減持京東同美團，而下隻最合資格就係快手，加上大市弱，沽一沽好正常，冇事又可買過。

內房股暫時止跌，內銀同內險就繼續下跌，內地即將開北戴河會議，希望會消息，要令市場重拾多少信心，如早前囗號式嘅政策一定冇人信，一定要出一啲市場上冇預期嘅方案，唔講有冇成效，起碼要令市場有憧憬。

港交所（388）截至6月底止中期股東應佔盈利63.12億元，按年增長30.52%，每股基本盈利4.99元，派中期息4.5元，按年增30.43%。

騰訊（700）至6月底止第二季股東應佔溢利261.71億元人民幣，按年增長40.56%。每股盈利2.761元。以非國際財務報告準則計，上季盈利375.48億元，按年增長33.44%，半年每股盈利5.48元，整體業績畧較市場預期為差。第二季國際遊戲收入升19％，扣除匯率變動下只得12％，而網絡同視頻廣告收入則上升34％，需求強勁。

京東（9618）第二季股東應佔淨利潤65.81億元，按年升50.39%，每股基本盈利2.09元。半年利潤128.42億元，按年升8.27倍。每股基本盈利4.09元。

美股話炒減息預期又延後而回落，覺得係更加擔心中國現時面臨嘅問題影響更大，所以美股先行，道指同納指分別下跌0.5同1.15％，中資股金龍指數再跌1.65％，外圍恒指已跌到18000邊。

美匯升上10.3.55，日圓已升穿146，歐元1..087，而人民幣進一步貶至7.34。美匯升，現貨金亦失守1900美元。