噚日朝早國家出咗一連串經濟數據，當然又全部比預期差，7月份工業增加值按年升3.7％，社會消費零售值升2.5％，頭7個月固投升3.4％，睇起嚟有增長都是好，原來又有幾多搬龍門，在計算固投中，國統局舊去年嘅基數中剔除咗佢認為唔符合統計規定嘅項目，用同一計法固投下跌幅度都不少。國統局亦指近期內房公司債務問題係階段性流動性問題，估計應該冇人信，上半年住宅落成量繼續上升，但賣出嘅就減少，樓價跌，供應升，要消化囤積嘅貨源都幾麻煩。

人行意外地下調中期信貸便利（MLF）15點子至2.5％，MLF係人行放水畀銀行嘅利率，通常當減完MLF後，市場貸款利率（LPR）都會下調，減低社會借貸成本。原本預期國家都唔想咁快減MLF，減息降準，希望等美國息囗肯定見頂或開始減息後先做，以減少對人民幣嘅衝擊，依家情況危急，但估計對內房同樓市都幫助不大。

國內經濟數據差，A股跌一跌，試一試星期一低位又回升平收。港股再跌192點，冇力彈，上證股市反彈恒指跟唔到，三點後就跟歐洲同美期下跌，簡單講恒指同科指一齊跌到落6月初低位拉上嚟嘅上升支持，恒指支持喺18500，而科指則喺4127，以依家市場氣氛，要穿太易，隨時連一底高於一底嘅形態都打破，唯有寄望今日騰訊（700）業績救到大市，彈上去回補前日嘅下跌裂囗，希望可以拖延跌勢，或者中港股市唔好再頂，上面無疑係有無形嘅手頂住，上兩個星期先話活化資本市場，依家已跌咗5％，港股若跌多千幾點，股價夠平，成交自然多，亦自然活化，好過等政府減印花稅，港股印花稅全球最貴，起碼有一樣是No 1。

美股升一日又回，早前講納指跌穿20天線就會再繼續調整，現在勢頭未變，道指噚晚跌穿35000點，亦開始失守，圓頂漸漸形成。惠譽又話會降低美國銀行評級，銀行股指數跌近3％，Tesla由中國減價減到美國，中概股金龍指數再跌2％，又拖到外圍恒指跌到18300水平。美匯103.21，人民幣7.3都失守，今早報7.325，現貨金亦跌到1900美元。