上個禮拜五內地股市終於頂唔住，結果一日連續跌穿20、50同250天線，基本上所有板塊無一幸免，一枝減世陰燭基本上將早前171點的升幅打回原形，對中港股市憧憬結果又係同一結局。收市後國家公佈7月份新增貸款只有3459億元，2009年11月後最低，社會融資規模5282億元，亦係2016年7月來最低，兩者比預期不到一半，人民幣長短期借貸意慾下跌，何況買車買樓，亦終於明白為何A股一日跌咗2％，當然一定會有人知道出爐嘅數字一定唔好。

新增貸款下跌相信大家會無意議，只係遠不及預期令人擔心。早兩日公佈嘅消費物價指數大家都話已進入通縮，通縮嘅問題係同一樣物件，今日買會比下個月買貴，所以唔係必需要用嘅，一定會推遲買，除飲食業外，其他消費一定下跌。新增貸款急跌，居民同商家因睇唔清前景，不敢過度借貸，某程度上是好事。今年上半年新增貸款和M2都因中國復常憧憬而大幅上升，佔國民生產總值15％，現審時度勢下回落，避免過度借貸，某程度上係一件好事，現時中國經濟極度低迷，無論新增貸款升或跌都係要捱打，只係過度澎脹就會死得更快，至於要捱幾耐，就要睇阿爺係咪有神來之筆。

內房債危險機越趨越熱，恒大、碧桂園、融創、萬科四大民企內房發展商（勉強加入龍湖成五大），有三間都曾經出事，係萬科仲頂得住，當然以恒大最為沉淪，同負資產差不多沒分別，而近日碧桂園都漸入困局，冇能力還息，虧損極大，致股債急跌，上個禮拜碧桂園股價已跌穿1元，就碧桂園系內兩隻藍籌股兩年內已唔知令恒指跌咗幾多，最新發展係今日起11隻境內債會停止買賣，因會安排同債權人召開會議，涉資規模160億元人民幣，復牌時間再確定，停得嘅多數係講你知公司一定無法全數還款。上周五早上政監、銀行同內房開嘅金融會議，中午公佈會喺8月底至9月初落實執行早前嘅政策，內房股午後抽一抽就冇力。整個內房民企債務已多到冇得估計，冇人會考慮做白武士，先唔講恒大過萬億債務，好似碧桂園，2022年底有千幾億現金或等同，依家已話還唔到息，燒錢速度何其快，就算依家有人肯比幾百億去幫佢，都未知捱到幾多個月，依家係現金流出現問題，舊年曾有人提議有問題內房斬件出售，依家或者最佳時間已過。內房問題有幾深大家都知，中國政府冇理由唔知，明知放幾多錢落去都可能係吊命，暫時真係睇唔到用錢打救內房嘅意慾。

美股上星期五個別發展，納指繼續落，穿50天線後繼續向下，等佢企得穩先再諗。利率期貨顯示至年底息率維持喺現水平機率最大，美匯102.85，日圓貶至145，英鎊回至1.27，人民幣跌至7.26。紐約期油83.2美元，美匯升，現貨金跌至1913美元。

中資股的金龍指數下跌3.6％，恒指黑期失守19000點，跌至18800水平，巴巴（9988）ADR跌至約94港元，京東（9618）143港元。恒指今日相信會跌穿7月7日至今嘅上升支持，短期要睇前低位18562，只有希望不要破壞6月起一底高於一底的形態。