上周五美國公佈嘅7月份新增職位少於預期，下月份利率期貨顯示息囗唔變嘅基率為87％，而12月都只係有三成機會再加，美債息由高位回落，美匯亦回軟，美股先升後回，道指先升300點後倒跌150收市，尾市沽壓湧現，三大指數都低收，蘋果預期今季收入倒退，下跌4.8％。美股開始在高位遇到阻力，道指上日一度升穿10天線，反而要倒跌到20天線水平，上面沽壓非輕，睇呢兩星期出現嘅日本調整YCC同美國惠譽事件，美股都先跌一跌先，高位難免動盪，況且依家美股以標普500計算嘅預期市盈率已去到19.5倍，較以往平均5年同10年值都要高，而且較歐股預期市盈率更高出三成以上，所以難免會有波動同回調，但強勢市場回幾多就要一步步睇，道指初步睇34500可唔可以守到，反而納指好似差少少，納指100上周跌穿5月來未曾失守嘅20天線，十天線都亦都下跌，以穿穿雙頂頸線阻力睇，有機會先下試14800。

美債息回落至4.03厘，美國政府已預告今季政府發債會再創新高，股神同Elon Musk話會繼續投資美債，美息回調，美匯日中低見101.77，收102，日圓反彈上141,76，歐元重上1.10，人民幣1.188。

港股上星期先高後低，收市重回10天同100天線水平，今個星期算關鍵，最差只可以橫行，唔應該再跌，上星期五憧憬國內乜嘢四部門聯合新聞發佈會，事前雷聲大，乜嘢組合拳，結果恒指升四百幾點後，十點後即全面回落，新聞發佈重點都冇乜新意。國家近一個月喺政府同國常會層面都已制定咗手框架，問題係地方政府同金融機構點執行，由地方政府制定政策提供消費便利同補貼，而金融機構就提供消費信貸，問題就係地方政府冇錢，以往地方政主要收入除咗稅收外，就係賣地，除咗幾大央企國企外，內房公司未能還錢，何來有錢買地，地方政府可能冇能力執行國家制定的框架。至於房地產，既然囗頭上放棄房住不炒，LPR（貸款市場報價利率）早前都只減十個點子，起碼要多減十個點子才會有多少成效，再要配合減息降準，仲要完全落實保交樓，人民先會對樓市再有信心，樓股回升，才可提振消費，依家言之尚早。

近期有多間停咗牌很耐嘅內房板塊股份復賽，先有融創（1918），再有世茂（813）同恒大物業（6666），相信會陸續有來，簡單講呢啲公司要復牌先可以喺市場集資還債。