惠譽降美國主權信用評級至AA+，惠譽基於美國政府過去20年嘅財政同債務管治情況日益惡化，同埋對現任政府違反財政紀律失去信心。報告指出依家美國財赤佔GDP 6.6％，財赤嚴重財務上限未能解決。報告喺噚日亞太區朝早6點發出，美股已收市，道期納期各跌逾200點，但亞太區股市就率先下跌，日股跌800點，港股跌近500點。翻睇歷央，上一次美國被降主權評級係12年前，又係8月，又係啱啱解決咗財務上限問題，當時主角係標普，理由都係美國政府削減財赤計劃未能達到期望，12年前負債14萬億美元，依家差唔多32萬億美元喇。美國主權評級被降低，有機會享有最高評級嘅企業有機會都被降低評級，可能包括大型銀行，企業發債成本上升，所以暫時好難預計短期影響，要睇幾日美股走勢再作評估。12年前美國被降低評級後美股兩個月跌10％，而港股則跌14％，當然當時環境同市場深度都同依家唔同，始終美股係強勢股市，數據初步只作參考。

另一個消息就係美國眾議院高調調查大摩同Blackrock，指佢恊助中國企業搵資金，仲投資喺對美國構成危險嘅戰略性產業，究竟係冰山一角，抑或係陸續有嚟，市場都會擔心，係咪會影響外資流入中港市場，噚日先講港匯強番多少，雖然暫無大變動，都要留意下。

中港股市跌住下跌，上證A股跌30點，失守早前預定支持嘅3276，走勢係差，可以話係突發客觀因素，但要守得住100天線3257，盡快扭轉跌勢回升。

港股都係，已經唔敢太樂觀，怕失望，但都估唔到突如其來一下，連19700都跌穿，輕微跌入早前下降通道中，無論如何港股係連升兩個月（今年是第一次）且成功升破突破行唏半年嘅阻力，依家回調無疑比預期深，如果今日能重上19700，就暫時未能睇淡，只作因個別事件令港股調整幅度超預期，仲可稍為看睇好。但如再跌穿19250至19300，就不宜再憧憬，即係又一個圖表陷阱，就似內地人所講又被割韭菜。

美股回落，道指、納指各跌超過300點，美十年年息升上4.08厘，知期避險令美匯升上102.6，英鎊1.27，日圓143.3，人民幣又回落到7.2水平。中概股指數跌4.2％，部份追回港股昨日跌幅，外圍恒指今早報19380，預期低開140點。

恒大物業(6666)今日復牌。