美國聯儲局決定將息囗加多25點子，會後鮑Sir亦唔再評論息囗走向，唯一今次冇講到就業強勁，反而轉囗風講就業數字有轉向跡象，可暫時視為最後一次加息。

上證指數噚日由升20點轉為倒跌6點收，高位3245，接近今個月嘅兩個頂位就見到阻力，上證指數必需升穿6月高位3276，先可去得更遠，否則港股升勢亦都會受制。

港股表現較好，唞一日就後再起動，首先升穿100天線（19579），正迫近通道阻力19750，恒指既然三日內出現兩個上升裂囗，係強勢表現，最好盡快升穿19750，升穿後喺上面鞏固，免得夜長夢多，亦希望走出行咗半年嘅下降通道。噚日升市主要由中資股帶動，褔士入股小鵬（9868），小鵬股價升33％，上次被中東資金睇中嘅蔚來都升咗13％，外資紛紛睇中中國電車股，反映國家電動車已走向世界前列，而褔士明顯地希望借小鵬技術恊助自己發展電動車業務。

科指升穿6月高位（4271）同7月位（4280），成為升市領頭羊，下一阻力已去到4800點，科指由舊年3月底到依家都喺低位橫行未有真正升過，所以若果真係升市，可以行得更遠。

歐央行跟加息25點子，美國第二季GDP環比升2.4％，預期係1.8％，6月耐用品訂單按月升4.7％，較預期升1％為高，美股先升後回，前指跌237點，債王全部沽出地區性銀行股，金融股下跌，納指跌77點。

日本央行喺今日嘅政策會議上將討論調整孳息曲線控制（YC），或允許收益率升至「在一定程度上」超過0.5厘的水平，日元反彈上139，美匯升上101.69，人民幣噚日曾高見7.12，今早已回落到7.167。

今日期結，黑期今早跌至19350水平，預示低開300點。