踏入七月份最後一星期，期指離奇大低開下，現貨指數低開後曾彈一彈就掉頭再落，噚日明顯不利消息冇太多，較大嘅只有摩通調低內房股嘅目標價，港股就係咁樣，上落市中升跌都唔需要咩理由，上證A股只跌三點，日股升近400點，只係港股自己跌落去，恒指大跌407點，成交935億元，恒指急挫下成交自然放大多少，指數又跌回了下降通道中軸位置，而且接近保力加通道底部18416。至於指數下跌係咪同期指結算有關，要再觀察，關鍵支持位17700看法沒有變，而由低位14597拉上嚟嘅支持位喺18500附近，噚日已經掂到。

國內股市噚日未致大跌，人民幣日中又回到7.2水平，大家都等政治局會議會有咩刺激措施出台，上星期公佈嘅上半年GDP已較預期差，三頭馬車中，內需竟佔咗七成有多，即基建同出囗完全追不上。政治局會議開局，執筆時並未有咩特別公佈，都係扶內房同刺激電車市場，而且提出活躍資本市場，但實質政策未有公佈，但噚晚中概股喺ADR時段就大升，金龍指數升4.5％，帶動夜期一度600點，恒指曾升穿19200，今早黑期報19150，預示恒指高開500點。巴巴(

（9988）ADR折合為94港元，美團（3690）131港元，騰訊（700）337港元。

摩通一份報告，內房板塊四腳朝天，報告指國家近期推出嘅城中村改造利好因素並未能幫到內房股嘅流動性憂慮，恒大嘅問題只會加快資金逃離內房股，碧桂園連續兩日股債雙殺，下年到期嘅6.5厘債價跌到35元，而25年到期嘅6.15厘債價更跌到23元，摩通大幅下調碧桂園（2007）同碧服（6098）目標價去到0.9同6.7元，削價6至7成，碧服股價噚日大跌18％至7.641元，碧桂園跌8％。龍湖（960）質地較好嘅都要跌8.5％。內房下跌，市場都即擔心內銀內險有幾多內房板塊的投資，都難逃一跌。

美股繼續上，道指升183點，納指喺新成份股比重生效下微升26點，Tesla由低位255美元反彈上270美元收。有人繼續唱好美股，高盛料標普仲有6％上升空間。美匯升上101.4，歐元1.106，日圓141.5，而人民幣就係7.19，不過噚晚中資股大升，今早人民幣喺開指導價後或者會有較大變動。