今個星期會有多國央行議息，包括聯儲局香港時間星期三深夜會預期加25點子，其他包括有歐央行同日本央行。美股上周反覆，道指升幅收窄至3點，雖然係咁，升勢未有扭轉，亦未出現轉角訊號，就算有回吐，34600守得住未敢言跌。納指就跌30點，大型科技股繼續有序調整，納指100重整成份股比重下，指數拉鋸中，有大行估計換馬股份涉及600億美元，比早前估計嘅少。納指正下試10天線支持，而最大支持喺兩個幾月都未失守嘅20天線，納指綜合指數嘅20天線喺13850，而納指100就喺15250。Tesla決定以價換量，搶市佔，股價短期受壓，目前6月底嘅上升裂囗已完全補番，下一大位就要睇240美元喇。中資股指數微升，但恒指夜期同黑期都跌穿19000點，黑期做18920。木頭姐嘅主要基金已全部減持中概股，只係旗下嘅分類基金仲有少量中概股，木頭姐近兩年已經鋒頭不再，睇吓中概股會唔會重生。

美10年債息3.83厘，美匯升上101.09，反彈最大阻力喺102，日本繼續鴿，日圓跌落141.78，英鎊1.285，而人民幣就報7.188。紐約期油升上77美元。美元彈，現貨金又回落到1962美元。

港股繼續在區間游走，今個月高低波幅1300點，算係符合最低要求，日線圖走勢唔算太差，問題係跌唔落去，但又冇力上，今個星期五會係期指結算，大戶倉位未明，如果呢幾日出現反覆嘅先跌後彈，或一下跌落去（似五月咁樣)，就轉好倉機會較大，相反就轉淡倉機會較大，無論邊一邊都好，預期期結後都會有晒方向，下面仲眼17700為最下支持位所在。

科指走勢仲係較恒指強，亦係未睇得太淡原因，科指中，巴巴（9988）已成為焦點股份，佢嘅消息能帶動港股上落，上周五巴巴終於完全減持咗商湯（020）股份，而噚日亦發咗通告指唔會參與螞蟻嘅回購計劃，唔通後者再上市計劃有咗眉目？