前日有消息大市先跌後回穩，結果噚日冇咩大件事公佈，只見有傳聞話會放寛一線城市嘅限購措施，而人行就上調企業同金融機構嘅跨境融資參數至1.5，即相關企業可以增加境外資金來源，人民幣一早就由7.22抽上7.18，上證指數高開後就回落，午後跌幅擴大至29點，低收3169，上證已跌到250周線嘅中期支持位，一收穿就好大機會會再落，就要睇到3030。

港股早段抽上19200，氣勢如虹之際又告冇力，七月恒指開19000點，跌過落18279，升過上19534，到頭來又係原地踏步，成個市鎖住喺一個區間橫行，亦可以話仲未擺脫到二月到依家嘅下降通道同每月高位都較前一個月低嘅走勢，五月高位20321，六月高位20155，市況係膠住咗，成交多咗少少，係咪有錢慢慢開始入場仲要睇。北水炒ETF，前日入160億，噚日走130億，所以話冇特別意義，估計因為ETF交易成本相對正股仲低。講開交易成本，自從香港加咗交易徵費之後，平均成交明顯下跌，當然仲有其他政治同客觀因素，但連馬來西亞最近都宣佈減交易徵費，港股嘅交易成本已經冇競爭力。

美股繼續個別發展，零售股做好，道指一度再升逾300點，收市只得一半，而納指就跌300點，Tesla同Netflix 前日盤後公佈業績已大跌，噚晚跌幅掂大，前者跌一成，加上今晚納指收市後會調整比重，大市值股份被減，跌係合理。

美匯抽上100.77，非美貨幣回落，英鎊1.287，日圓接近140，人民幣7.175。紐約期油75.63美元，預期下半年減產後供應短缺，油價會企穩，而現貨金就報1972美元。