港股噚日嚟架一個單日轉向，恒指低開200點後，最低見18711，無厘頭午後一點半後就開始反彈，結果恒指收番上189852，只跌63點，大波動下成交增至千一億元，而上證指數亦倒升收市。環顧周邊，觸發大市會反彈嘅消息唔多，只見有引述內地傳媒報道嘅係國務院會喺今日下午有新聞發佈會，會介紹促進同擴大民營經濟發展嘅情況，亦會有救樓市措施，但消息仲未證實，睇股市就似，但睇人民幣走勢就唔太似，人民幣到港股收市時已落到7.22，原因可能同中信證券日前一份報告有關，報告內指出中國係有降息降準嘅空間，一放水人仔匯價自然受壓，或者可以解釋點解人民幣下跌緊，股市仍有反彈。

恒指單日轉向收回十天線上，走勢由弱勢轉為中性，10天線噚日喺18874，失而復得，三大指數，恒指、國指同科指都喺低位開陽燭，其中科指仲企喺所有平均線上，屬最強。如果科指係整固，最好重上4200點上再鞏固下，個底會較實。大科技股中，巴巴（9988）、快手（1024）逆市升，京東（9618）跌幅大幅收窄。而噚日亮麗嘅就係高質嘅中特估，包括三大電訊股，兩隻油股，全部逆市升，好似中移動（941），守住條100條線，高位已橫行咗三個月，升穿65.6係有力突破上。只要呢五隻優質中特估肯行，其他基建、重機同資源股都可能有得跟下。北水噚日大幅淨流入168億元，大部份係買指數ETF，根據往績冇得作準，因多數過幾日又全部沽出，北水大量買個股指標性相對較大。

舜宇光學（2382）預期中期盈利下跌65％，扣除非現金項目，盈利預期下跌55％。

納指100明晚收市後就會做rebalancing，最大七隻成份股佔比由55.1％降至43.7％，所以預計ETF等相關被動組合會有3000億美元流動，調整後，微軟同NVDIA佔比減3％，APPLE減1％。

Tesla 季度收入創新高，盈利27億美元，較市場預期24億美元高，因減價關係，毛利率則下跌。股價盤後急挫5％至277美元。

道指升穿35000點，納指則在rebalancing前夕表現持平。十年債息3.75厘，美匯100.29，英鎊1.293，歐元1.12，人民幣貶至7.23。