港股打風小休一日下復市，喺一眾預期之內嘅不利消息下下跌，恒指低開100點後，半個鐘內已失守19000點，其後大部份時間喺低位橫行，收市叫做力頂19000點，全日下跌398點。恒指一日就完全回補上星期四形成嘅上升裂囗，勉強守住19000點，回吐係預期內，但我睇要上升19000點唔應該失守，依家10天線處於18920，呢個係最後防線，若收市跌穿就要重新估計喇。

點解話係預期內嘅不利因素，一係國內經濟增長放慢，4月開始大家已知道，人民幣弱都幫唔上出囗，日前公佈嘅弱GDP反映復甦唔似預期，而對國家有大型扶持經濟措施嘅期望都淡咗落嚟，弱經濟亦反映喺市面上嘅幾個層面上。依家國內人除肯花錢喺飲食同基本開支外，其他消費都下跌咗。維持國內經濟動力嘅三頭馬車中，消費已弱，固投就只得國企撐住，民企同私人企業投資下跌，原因除咗對經濟失信心外，亦冇合適項目。過去幾年反壟斷執法壓制咗好多大型科技股發展，亦曾出現裁員潮，導致依家青年人失業率高企，若青年人失業率持續高企，人材就會外流。依家美元弱，人民幣都彈得未夠勁，阿爺減息空間有限。

二係南非大股東又出來話會有秩序沽出騰訊（700）股份，每年沽2-3個％，其實大家都預咗你會繼續出貨，配合噚日騰訊進入業績公佈前的blackout period，未來一個月冇得回購，真係時間啱啱好。騰訊亦離奇地只開喺8毫子，跟住一直插到尾，低收336元，跌近5％。

三係恒大（3333）公佈咗21年同22年業績，結果兩年合共輸6000億人民幣，公司負債24000億，兩個者算係紀錄。恒大賬面現金140億元，可用的只得43億，而負資產逾5000億元，真係負可敵國，都唔知可以點救。恒大業績差亦是預期，復牌當然無望，但係又唔可以立即破產清盤，如果破產，都唔知道有幾多內銀內險幫恒大融資同有投資恒大債劵嘅壞賬要浮面。恒大搞到成個內房物管板塊大跌，龍湖（960）同碧服（6098）各跌一成。

美股繼續上升，美銀同大摩業績後分別上升4.4同6.5％，金融股帶動道指上升366點，納指升100點，靠微軟帶動，微軟為佢嘅AI軟件收30美元月費，股價升4％。中概股3.3％，相信大部份係反映噚日香港跌市。恒指夜期再跌130點，黑期今早跌100點，今晨北韓又射咗兩枚導彈落喺日本海經濟水域，日本抗議，地缘政治稍微升溫，對股市或者有啲影響。

美匯99.98，其他非美貨幣變動不大，人民幣又落到接近7.2水平，中港股市可能又要震一震。