香港噚日打風，突然變咗一個長周末，環球市場就繼續行。美國上周五個別發展，摩通第二季盈利升67％，好過預期，扣除咗5月收購咗FRB嘅27億美元特別收益，盈利仍有40％增長。另外富國銀行同BlackRock次季盈利都好過預期，結果金融股上升，道指噚晚繼續上揚，已連升6日，納指唞一日後回升131點，納指會重整成份股比例，24號生效，會有多少波動，短線防守位係早前嘅小雙頂13555，再落就係20天線( 13709)，兩個月未曾跌穿過。

美十年債息回升上3.8厘，Fed Watch期貨顯示月底加息機會愈9成，今年再加機會唔夠20％，而一年後會降至4.5厘機會最大。美匯99.9，連跌五日後暫時企穩，反彈阻力先睇100.4。英鎊1.307，日圓138.9，而人民幣上周五由高位7.126回到7.18水平。美匯止跌，現貨金亦回落到1955美元。

阿爺噚日公佈第二季GDP按年升6.3％，預期升7.1％，而上半年增長則為5.5％。上證A股跌28點，日內曾失守3200點關囗，資源、鋼鐵、石油股下跌，電力股則企穩。以現時增長勢頭，今年經濟增長難達標，而大摩亦調低中國今年全年經濟增長至5％，意味下半年增長只得4.5％。

港股上周恒指由低位反彈逾千點，到19500就掉頭，上周五晚夜期同外圍恒指都回至19300水平，恒指由2月到依家都喺一條大型下降channel 裏面，仲未走出，依家反彈到接近通道頂，阻力約喺197-19800水平，沒有期望一下子就衝得破，反而希望調整一下，最多回補上星期四嘅上升裂囗，總之19000唔穿短線仍有再上試高位機會。上星期五科技股唞氣中，幾隻中資電訊股接力，最好力係聯通（762），三大基建股欲行又止，睇吓今個禮拜係咪喺調整市中有股份接力。恒指黑期噚日曾低見19200水平，最新為19250，預期今日低開160點。

即將進入業績，未來三星期會係公司發盈喜盈警高峯期。

比亞廸系內公司發半年盈喜，比亞廸（1211）半年料上升1.95至2.25倍，儘管上半年電車行業競爭激烈，集團在去年高基數下市場份額持續上升，繼續新能源車嘅領導地位。而比亞廸電子（285）半年盈利亦預期上升中位數約1.3倍。

受惠煤價下跌，華能（902）半年轉賺最多67億元人民幣，華國（1071）半年多賺7成。

資源股盈利倒退，上海石化（338）半年料虧損11億元人民幣，鞍鋼（347）半年料蝕13億元，而洛鉬（3993）半年盈利預期跌85％。