人民幣進一步反彈，噚日港股收市後美元兌人民幣跌到7.168，配合美元回落，中港股市全面做好，上證衝到上10周線，升40點，收3236，走勢仍算是跌後反彈，要升就要升破上月中高位3276，扭轉一浪低於一浪嘅走勢。中國噚日公佈6月份進出囗數字，結果兩者都較預期為差，人民幣下跌對出囗冇幫助，而入囗下跌因內部經濟差，需求自然減少，可以理解，股市未受數據差影響，而瑞信亦出報告對中國股市嘅投資評級上調至增持，預計在製造業下滑嘅情況下，會有刺激措施出台。

港股大裂囗高開300點後反覆向上，升到上19350高收，成交千一億元，科技股主導咗大市升勢，科指上到4237，一下子已升到接近4250至4270嘅初步目標，噚日恒指升幅係預期外，原本估計挾淡倉上到18800至19000就會止步。噚日又出現咗個大裂囗，係咪需要回補，所以現水平非常尷尬，如果覺得大市已跌完，當然有回吐到19000邊買貨是最佳劇本，用十天線或18800做退場位，損失有限。

除咗大型科技股上升外，資源股亦因美元下跌而造好，一直跑輸大市嘅生科股亦都大反撲，新能源車股反而有回吐，成個板塊已升咗兩個月，資金有其他對象，難免會流出。

繼日前CPI後，最新的美國6月份PPI亦都增長放緩，只0.1％，十年債息進一步跌到3.77厘，美匯失守100關囗，最新報99.76，一眾非美貨幣向上，歐元升穿1.12，日圓升上138，人民幣7.1511。美元下跌刺激下，現貨金升至1965美元。

美股繼續向上，息囗走向漸明朗，納指再升逾200點，中概股金龍指數再升2.5％，今早外圍恒指已升上19550。