美國今晚就會公佈6月份嘅消費物價指數（CPI），市場預期是升3.1％，較5月嘅4％大幅回落，表面睇同聯儲局通脹目2％都好接近，照計聯儲局應冇理由加息，但聯儲局係睇核心通脹數字，5月份為5.3％，6月預期都係升5％，核心通脹跌得慢，就算佢跌到4.8％，今個月都係加25點子機率較大，只係往後再加嘅空間就愈來愈少。

噚日人民幣日中回升300點子至7.2水平，中港股市借勢挾倉，上證A股上升18點，3200點又暫時守到。港股曾經升到上18806，最多升超過300點，當然第一關18800前又再掉頭，午後升幅收窄至180點，收18660。大市連續兩日升上去都回頭，繼續叫你去沽，當然恒指仍未轉勢，科指重上4000點，大科技股大致上升，科指繼續跑喺恒指前，當升市時，科指升幅較多，跌市時，跌幅亦較恒指少，一隻巴巴（9988）ADR時段嘅上落已可左右港股第二日開高開低。恒指下面大位18000點，上面18800至19000點，依家喺中間位，跌係符合劇本，寧願跌落去時買些少目標股份，最怕市場深度太淺，先挾上去，其後係咪再跌已經係後話，恒指企到19000點上可轉為較中性。

阿爺去年底搞金融16條，主力扶助內房走出谷底，日前宣佈延期至明年底，大部份內房物管股都高開，但持久力就一般，較穩陣嘅中海外（688）同龍湖（960）等仲要倒跌收市，市場對今次政策延期都係信心唔大，亦可反映內房問題仲係嚴重，而國家亦暫未見有可行策略穩樓市信心。

商湯（020）上周二早上十億股大手上板，同預期一樣，其中一個沽家係阿里巴巴，以1.82元減咗5.57億股，持股減至3.15％，往後再減持就唔需要公佈了喇！

美匯跌至101.6，美元兌日圓今早跌穿140，歐元1.1018，而人民幣噚日反彈後徘徊7.205。受油組穩定價格措施刺激，紐約期油升近75美元。

美股上升，道指升逾300點，納指升75點，中概股在美股ADR時段相對較強，恒指夜期又上升百點，且看港股是否又再開高低收，夜期強，現貨時段弱嘅走勢又可以維持幾耐。