中國公佈6月份CPI（消費者物價指數）按年持平，按月跌0.2％，連跌5個月，而PPI生產物價指數，按年跌5.4％，按月跌2.8％，因煤、油等大宗商品價格大幅回落，而舊年基數亦較高，但經濟下行亦係事實。國內股市勉強頂到，上證升7點，重上3200點。

港股就好似好多人估計一樣，高開冇人信，開18747，接近全日高位，18800得個望字，最多升逾400點，最少縮至60點，收市升114點，指數是升，其實以開市收市價睇係跌，成交780億元。指數開高冇承接，一下子幾乎升幅全部上繳，已經唔期望恒指高開後會有力再上，企到開市高位已值得鼓舞，結果繼續維持弱勢，喺弱方區域18000至18800反覆。

科技股又係只得頭段，焦點股巴巴（9988）開最高位89元，收87元。科指我要佢企穩4010先有期望，結果一閃即逝，只可以講相對恒指較強，但一樣冇動力。唯美股開市後ADR嘅中概股並未有跟港股回軟，反而企到高位，巴巴喺ADR成交每日都二、三百億港元，相比喺香港還多，反映資金主戰場喺美國嗰邊，港股成交少，少少錢已可左右大市上落，尋日下午高位回落時，美期跟住跌，港股收市後，美期立即掉頭向上。依家港股喺低位，但又一直示人以弱，暫不建議大注做淡過夜，感覺會挾一兩吓勁嘅，只因成交太少，太易舞高弄低。

Meta 嘅threads推出一星期後用戶超過一億，升1％，其他大型科技股一同回落，納指冇起跌，道指升209點。

美匯又回到102邊，歐元升穿1.1，日圓升上141.3，人民幣7.2280。