美國上星期公佈嘅大小非農數據不一，小非農職位增長強勁，但大非農職位就增長就放慢，但係市場關注嘅平均時薪按年上升4.4％，預期為4.2％，未有回落跡象，服務業同建築業唔夠人手，大企業高薪職位裁員已近尾聲，但係市場上仲有好多中低薪工作空缺，都要高薪搶人，搞到時薪高企，今個月加25點子已無可避免。

美股上周五反覆上落下跌市收場，道指跌187點，納指微跌18點，美十年息升上4.08厘，但美元就回落，美匯102.27，歐元1.098，迫近1.1水平，英鎊1.284，日圓都反彈上142，日圓一日半內由144跌到142，日本通脹開始好慢咁上升，日圓寛鬆政策可能最快下年會完，外匯嘅朋友指近期日圓交易有少少唔尋常，似有人慢慢拆倉，由其係歐元對日圓，未來要留意日圓走勢，美元回落當然對股市有利好作用，但日圓若果拆倉，威力都好大，所有套息交易嘅投資都要平倉，股市都可能有波動。人民幣離岸價7.232，相對星期五港股收市時反彈咗200點子。

7月第一個星期港股先高後低，高見近19500，低見18250，波幅1250點，一周波幅算大，上星期五中午傳出巴巴（9988）被罰80億人民幣已落實，大市衝一衝又掉頭回，已傳咗好多次，加上又係周末，相信或想搏嘅人唔多，結果晚上就嚟真，監管機構落實螞蟻同旗下公司合共罰款71.2億元人民幣，而騰訊（700）旗下嘅財付通則罰30億元人民幣，消息落實後，市場反應正面，希望反壟斷事件告一段落，夜期急升上18750，而外圍恒指就升上18650水平。巴巴ADR股價升至88.5港元，百度139.5港元。問題係港股今日高開後係咪可以承接再上，抑或係開高又跌過，就要睇資金點睇今次罰款係咪為事件畫咗一個句號，當然人民幣走勢亦都主宰中港股市短期去向。科指走勢較恒指強，恒指已跌穿6月底低位，但科指仍守得住，如果今次借事件能衝得上4010點並企穩，港股短期或有救。