港股表現完敗全球股市，噚日明顯係港股拖住國內股市向下，上證A股又再退守3200點關囗，跌0.5％，相對港股還好，日經跌560點，但指數在33000點水平，而恒指最多跌600點，跌幅3％，成交972億元，難怪港股現時是炒家多過買家，炒家注碼起碼減半。恒指日前收喺19100水平，走勢上冇好淡方向，只知道19500難破，但估唔到訂下嘅兩個位19000同18800，一下就穿，19000點跌穿並唔驚訝，但係18800咁快穿，就一定要停，仲要喺消息唔多嘅情況下，恒指由十點半起一個鐘內急挫約四百點，當然會有平倉盤幫助推低個市，由18800至18500重倉區，陣亡嘅牛證相對約5000張期指。

噚日三大國有銀行，工、中、建一齊除息，合共剔走恒指150點，所以開喺19000樓下並唔意外，問題係除息後仍不斷向下走，起初科技股頂得住，最後當然失望而回，市場將跌市元兇歸咎放高盛對內銀嘅研究報告，建議沽出嘅包括有工行（1398）同埋農行（1288），前者目標價被高盛劈價三成至3.55元，報告內容大致係中國經濟令人擔憂，內銀同內房關係千絲萬縷，舊年至今嘅內房債同城投債事件中內地好多劵商都已出現唔少虧損，而內銀最終亦好難獨善其身，加上地方政府債務嘅還款還息能力下降，最後就影響到公司盈利，派高派息率情況幾乎冇，幾大內銀跌幅2至3％，招行跌4％。其他藍籌股中跌幅較大嘅包括友邦（1299）同內需嘅安踏（2020）。

美國財長耶倫噚日到中國訪問四日，市場都沒有咩期望，皆因呢幾日雙方都繼續互相制裁，美國研究禁止中國企業使用美企嘅雲服務，而中國則禁止對外輸出鎵同鍺，應該係製造晶片嘅晶圓的原材料，又學多咗兩個生字。美國未來一年內估計可發1.5億美元國債，其中8000億會喺今年底完成，如果全部內銷，會抽乾銀行體系資金，所以都會四出訪問外銷，當然中國就係其中一個買家。

小非農職位大增，又驚加息，調整借口，七，月加息一早預期內，道指曾跌逾500點，收市跌366點，納指跌不足1％，中資股指數跌3％，今早外圍恒指再跌160點。美國兩年同十年息分別升穿5厘同4厘。美匯103.1，人民幣7.255。