中國6月財新服務業採購經理指數回落到53.9，預期為56.2，服務業都開始收縮，早前公佈嘅製造業數據已經差，噚日喺數字公佈後，中港股市一齊跌落去，另外一個原因可能係日前有傳中國大型國有銀行正計劃向地方政府融資平台（LGFV）提供25年嘅超長期貸款，以避免境外債務市場出現信用緊張狀況，但傳言噚日已經否認咗，但指出銀行作出貸款審批需要盡職審查先可放貸，字裡行間都唔係完全否定。當然日中人民幣再度回軟亦幫倒忙，對於人民幣疲弱，阿爺仍未有咩動作，短線可能希望貶值可以刺激出囗，但時間耐咗，就算唔引發走資，亦都大大減慢資金流入。上證指數跌22點，回試20天線，暫可以視反彈後回吐看，但要扭轉弱勢，必須企穩3280樓上。

港股跟跌又好，自己弱又好，升咗兩日回一日，就算係平，長線資金都仲等緊，市場游資多為短線，升少少就走。恒指噚日跌305點，頂住條十天線（19090），走勢上都係反覆行唔出方向，上面19500阻力唔輕，日前見19450就掉頭，今個月開19000點，起碼周線上唔要陽轉陰燭，所以失守19000點要ALERT，而穿18800就要停，因為向上或橫行都唔應該再破底，科指回58點，圖表上相對恒指比較強。國內服務業PMI數字差，一眾零售股率先捱沽，李寧（2331）跌5％，佢嘅體育用品股、飲食股都要跟跌。車股為近期大市焦點所在，噚日有啲回吐，小鵬（9868）預期下半年交付大升，ADR股價做好，升到接近58港元。

美股價期後反覆向下，聯儲局公開議息會議紀錄，大部份人傾向再加息，大家意料之內，利率期貨已顯示今個月會加25點子。三大指數跌0.2至0.4％。

俄羅斯和沙特先後宣佈減產，紐約期油價期後回升上72美元。

美匯升上103.34，美元兌人民幣又升上7.26水平，兩者皆對港股較差。