中港股市升一日後仲企得住，上證A股13點波幅下平收，深成指則微升。恒指低開幾十點後後，都叫有承接力，反覆下仲升到109點，收19416，成交800億不夠，技術上已開始回補6月21日19377至19504的下跌裂囗，企得穩19500，下一個位就睇198至19900阻力。7月頭兩日走勢跟6月開局一樣，升咗上去咬住，唔肯回頭，而且慢慢去挑戰上方阻力，暫時唔建議逆市行。噚日中午後曾一度倒跌，估計因為外電有報導指美國政府在現有嘅晶片限制外，仲準備限制中國企業使用美企嘅雲計算服務，好似亞馬遜嘅微軟嘅雲計算，在向中國客戶提供服務前需得到預先批准，結果恒指倒跌後又再扭升。當然噚日人民幣走勢亦幫到中港股市，上午喺7.24至7.25水平橫行，午後就急升上7.22，前日都聽到一個小道傳言，話俄佬喺上星期嘅一次擬似政變後，突然喺離岸沽售人民幣，兌換美元，似係防範類似事情再發生，所以人仔上個禮拜先跌到7.3水平，傳言當然無法證實，但國際間利益掛帥下，冇永遠的朋友同敵人應該係真嘅。

目前港股冇新錢流入，外資冇多踩多一腳，亦未見有低位積極買入。國內經濟差，樓市不景氣，內地基金又吸引不到新資金投資港股。如果依家係處於升市的收貨期，就一定係漫長同痛苦嘅。

港股細成交下，科技股微升，科指日前升穿幾下平均線後仍有力向上，而騰訊（700）、京東（9618）同美團（3690）等大科技股就重上十天線。商湯（020）盤前有逾十億股分別以1.95和1.82上板，收市穿2元，估計應該係巴巴同軟銀等減持機會最大。噚日焦點就轉到去生科股，上午都只微升，午後就開turbo咁，事緣係國家醫保局就談判藥品續約規定同非獨家藥品訂價規則兩事公開徵求意見，國內分析員指利好創新藥商，榮昌生物（9995）隻A股午後開市突然急升10幾％，帶動榮昌都急升18％，另外康方（9926）同埋信達（1801）都升10％，但CRO相關的藥明（2269）、泰格（3347）等升幅就小很多。

美股假期休市，恒指夜期同黑期都跌約80點，美匯103.1，歐元1.088，英鎊1.271，而人民幣則報7.2307。