噚日上午開市前傳嚟耶倫今個禮拜尾會到訪中國，國內又話會減美元存款利息，人民幣抗奮下最叻都只彈到7.25，全日試衝三次都衝唔穿，港股收市時為7.26。國內財新製造業採購經理指數50.5，勉強守得住盛衰分界線上，國內經濟差要政策扶持係肯定嘅。至於耶倫訪華應唔會有太大驚喜，耶倫以財長身份訪華，可能都係相談美國通過債務上限，可以再發債，要阿爺買債，當然中國亦都會討價還價，希望現有嘅制裁措施可以寛減或者舒緩，有冇成果就難以估計。

踏入七月，中港股市都開得好，上證A股上周重上3200點後，噚日人仔反彈，一囗氣衝上3244點高收，升42點，暫時擺脫短期弱勢，要升仲有一段路要走，上證指數上月16日一升到100天線3274就掉頭落，今次要衝得破先可行得更遠。

而港股亦喺科技股反彈下升390點至19306，圖表上暫時做到止跌，啱啱收復10天線，上面仲有 19500和100天線19900呢兩個大位，要展開升浪，首先要升穿19900，再打破自二月起指數每月高位都較前一月低的走勢，4、5月高位為20321同20155。噚日大市平開後慢慢買上去，升市嚟得實一點，成交900億元，當然如果升一日又回兩日大市只有繼續低位橫行，上面19800，下面18800區間反覆，跌穿18800就真係要減倉控制風險。

大部份藍籌股都向上，科技股領漲，但係大部份科技股10天線都未升破，仍要加力。電車股市場焦點，比亞廸（1211）、理想（2015）出貨和銷售數字一樣靚仔，分別上升4和8％，小鵬（9868）一向都係最差，依家銷售低位回升，4日差唔多升咗四成，市場話頗多空倉被逼平倉。中特估調整咗兩個月，都開始企得穩，且有少少回升力度。

美國國慶假期前夕半日市，三大指數微升，個股中最靚係Tesla，上升7％。中概股嘅金龍指數升2％，而外圍恒指則回落50點。沙地意外減產，油價只彈一彈，重回70美元水平。美匯102.96，日圓144.6，人民幣7.25。