半年結日美股進一步上升，消費者信心指數升，而個人開支就按月下降，核心個人消費開支上升4.6％，較預期低，耶倫繼續撑美國經濟，表示樂觀，通脹回落暫未對就業市場有影響，數據對美息走勢有兩邊拉扯影響，顯然衰退未到，通脹又開始受控，只係核心數字回落較預期慢，上星期五收市時聯邦基金利率期貨顯示今個月26號嘅會議中有85％以上機會加25點子，而下一次9月嘅會議中暫時有7成係唔變嘅。美十年債息3.84厘，美匯回落到102.92，美元兌日圓曾升穿145，尾市回落到144.3，歐元1.092，離岸人民幣7.267。紐約期油70美元反覆，比特幣曾跌穿30000美元，主要因美國SEC要求新嘅虛擬貨幣ETF申請要提交更多資料以便審批。

美股上周五又再升近期高位，美國幾大銀行過到壓力測試後預告第三季會增派股息，金融股拉起道指升285點，納指升近200點，半年升32％，蘋果市值創新高，突破3萬億元，大家期待的調整仍未出現。回想上半年，市場原預期自動駕駛概念會跑出，殊不知二月開始人工智能異軍突起，市場便追捧大型科技股，AI概念行到幾遠冇人估到，下半年大型科網股，晶片股仲會係市場最大嘅戰場，吼回吐時買入較安全。反而較擔心嘅係美國商業地產市場可能因經營環改變而下滑，或者係可預期嘅最大一個炸彈，到時市場或者會有一個較大嘅調整，或需要減息，調頭又利好科技股。

港股半年結收18916，今年開19570，半年跌600點，跑輸其他成熟市場幾個馬位。港股喺呢個水平估計利淡因素已消化得差唔多，中國經濟下跌，人民幣跌，樓市疲弱，中美關係冇改善，暫時估計未必會再跌穿17700至18000區域，但要升就要睇人民幣會否止跌回升，今個月中央領導層開會時有冇扶持經濟政策出台。中美息囗仲會有擴闊空間，要睇美國加幾多，中國就肯定冇加息空間，但又唔減得，怕人民幣再貶值，上星期五差唔多見到7.29，人民幣下跌對中港股市肯定不利，但對中國出囗有利，問題係咩水平先會觸發到國家的嘅神經線要出嚟干預，市場大多估計7.3水平為阿爺底線，因為舊年十一月開始準備復常時都係呢個水平。公開市場操作或出囗術只可令人民幣彈一彈，要有刺激經濟措施同中美關係改善先令到市場對華發展有信心，人民幣先會真升。

港股期結後未有再真正跌落去，7月開局希望可以做好少少，先止跌。大市要升，要有真錢買上去，急升一日就掉頭唔係好現象，而大戶亦需要時間收貨，18000點至20000點行咗三個月，係咪足夠無法估計，依家外資參與率少係事實，冇外資參與，水太清，難起浪。但亦可以做定功課，大市起動時要先留意咩股份，大市要升，科技股一定係龍頭，當然騰訊（700）係首選，快手（1024）因剛轉虧為盈概念，近日綱易（9999）逆市走強，會係黑馬。另外，港交所（388）都係大市指標，通常同大市同步，可以回升上破20天線阻力，後市都可睇好。