期指結算日，轉倉活動完結後，港股一開就跌落去，其後大部份時間喺18900反覆，全日收18934，跌237點，成交800億元。美元兌人民幣日中搶到7.27，港股收市後又回落到7.25水平，人民幣雖然有秩序咁下跌，但繼續削弱中港兩地資產吸引力，缺乏外資熱錢下，港股已好似一潭死水，港人手持現金嘅繼續觀望，信念係港股永遠有更低價比你入場。所以人民幣最少要回升上6.8至7算水平，匯率正常化後，資產價值得以重估，股市先有吸引力。上證A股星期一急跌後，彈咗一日就反覆，3200都上唔到，依家只係彈，但下面支持位就頗遠，最近係3030。

港股一轉完倉就跌，依噚日分析，表面上大戶轉淡倉機會較大，睇吓今日黑期結算同半年結走向係咪可以扭轉。二月開始嘅調整浪仲是一頂低於一頂，一底低於一底，以為今次可以喺19500完成調整再向上衝，結果都係睇錯，中港股市同中國經濟一樣都係強預期弱實現。

美股個別發展，全部大銀行通過壓力測試，金融類板塊上升，帶動道指上升270點，富國銀行升4％，摩通高盛升3％。美國首季GDP向上修定，就業數字繼續強勁，衰退又降溫，另一方面息囗要落就難，科技股表現較差，晶片股受壓，納指冇起跌。中概股指數裏大多係科技股，跌1.6％，亦拖住恒指夜期向下。今早外圍恒指跌60點。

美息上，十年債息3.85厘，美匯升上103.35，非美貨幣全跌，英鎊1.2614，日圓撲上105，人民幣7.266。