噚日人民幣離岸價以7.24開出，最高迫近到7.25，中港股市開市後就反覆回落（即美元兌人民幣跌）到7.21水平，上證A股差唔多收復大部份前日跌幅，起碼重上250周線上，好似噚日所講，最好盡快重上3200上再打底。當然人民幣7.21唔係咩值得可喜，但之前人民幣跌落嚟嗰時上面監管機構都一直表示人民幣長線睇好，希望會配合李強總理歐洲訪問回國後會有措施穩人仔，谷經濟，人民幣企穩，起碼投資國內資產信心都大少少。

港股跟人仔上證反彈，力度就夠，但係成交氣氛就欠奉，恒指升354點至19148，人民幣當然有幫助，但都係7.2樓上，係暫時止跌，未係升，期指聽日結算，究竟係跌後反彈，彈上去轉倉，抑或係調整完，冇水晶球下始終冇得估，要每日去評估。依家環球市場都係反覆調整中，無論道指、納指，強如日股，趨勢都係調整，始終相信恒指如果升浪上星期冇理由有咁深調整，升三個星期，一個星期打回原形，所以有好多唔確定性，除非恒指短期內可以回補上星期四 19377至19504吧下跌裂囗並企穩，否則應未係持貨看長線的時候。北水昨日淨沽都74億元，彈一下都走。

美匯平穩，最新為102.52，其他非美貨幣都是橫行，人民幣今早離岸價7.22。

現貨金1916美元，市場避險情緒不高，黃金ETF亦減少。紐約期油68美元。

美股則反彈，納指頂得住20天線，回升1.6％，幾大科技股支撐指數上，月市升，因經濟數據較好，5月耐用品訂單和6月消費者信心指數都較預期好，衰退憂慮又輕微降溫，另一方面下月加25點子機會又大了。睇淡的大行就繼續指美國會進入衰退，但時間表就每一季地推遲。

中概股金龍指數升3％，大部份都是追回昨日港股升幅，今早黑期只升26點。