上星期五國內股市端午節休市，噚日復市後追返外圍同港股跌幅，上證A股跌47點至3150，指數跌穿上月位3168後，再跌穿250周嗰個3164嘅長期支持，要企穩最好盡快重上3200水平，再打過3200保衛戰，否則下面已冇咩支持可言，最近已去到3030，再落就要睇舊年四月同十月嘅兩個雙底2863。

港股夾喺環球局勢，股市同國內股市中間，更加寸步難行，周末俄羅斯事件未有惡化，美匯企穩未有向上，市場上暫時風險仲係中性，但一個擁有核武嘅國家如果內亂，後果可以好嚴重。美元平穩，但人民幣就繼續走軟，噚日亞洲區時段離岸價曾由7.21貶到落7.24，拖累中港股市下跌，港股早一步跌咗，早段曾反彈上19000，都係一樣無力，連跌五日後，收市18794，跌96點，成交838億元。依家只有等佢幾時出轉向，下面第一個支持位係舊年十月底同今年五月底拉上來嘅18500，再落就是早前提過調整0.618嘅17700喇！

股神再減持比亞廸（1211）253萬股，持股比率降到8.98％。

市傳巴巴（9988）會再最快第三季內分拆菜鳥和盒馬鮮生上市，開始實現其1+6+N。ADR股價無刺激。

美股回吐，道指有腰力，跌百點後收市只微跌，納指繼續調整，Tesla升得太多後被降投資評級，大型科技股中Nvidia，Meta跌3％，納指跌128點，仍屬升浪中調整。中概股指數微升，而恒指夜期同黑期都微升幾十點。

美匯102.75，近一周整個匯市主要貨幣只得日圓同人民幣有較大波幅，且都係向下，日圓143.5，人民幣今朝7.246。現貨金1935美元，而紐約期油繼續受經濟預期影響，喺70美元下反覆。