港股上星期扭轉連續三星期強勢，一大支陰燭已經吞噬咗前兩星期嘅陽燭，走勢無疑轉差咗，早排預期恒指喺18000點見底，係基於位置接近17700嘅調整0.618，二浪調整時間上用咗四個月，滿足時間同幅度上要求，況且能夠重上19500且企穩，所以回調低吸就以19500同19300做止蝕，佢一跌穿即證明已錯估大市走勢，必須要停。今個星期恒指走勢非常關鍵，上星期日線上已出現連續兩個裂囗，上次出現同樣情況係5月24同25號，之後再跌多700點到18000點見底，但期間未出現轉向。上周五恒指夜期同黑期都再跌多100點左右，加上外圍周末發生好多事，低開幅度或者更大，如果今日低開後能收復今日嘅下跌裂囗，即係大市有機會喘口氣，依家水平難以判斷後市走勢，要做好，最低限度要重上19300全年下降軌阻力先可以考慮。今個星期四係期指結算日，因成交大少，大戶倉位更加難估計。

布林肯訪華後，原預期中美關係雖然不至好轉，亦都唔會再差太多，殊不知拜登突然一句話就打破大家嘅期望，肯定不會昰失言，之後又後補話唔會影響中美關係，或者係有揣測指係因為阿林肯到華時並未得到應有嘅招待，為共和黨人質疑，呢句話係比共和黨人聽嘅，抑或美國根本無意同中國修好，乜嘢理由都好，就係中美係冇好嘅一日，除非其中一個國家實力下跌至一個地步對另外一個威脅減少，到時雙方嘅合作還可以從經濟角度去出發。

周末另一個主題就係俄羅斯一個突然24小時嘅疑似政變，雖然戲劇性落幕，但其實內裡咩葫蘆賣咩藥，所謂嘅叛變者轉軚太快，而普京亦立即當冇事發生，威信何在，令人更質疑佢已經唔可以撑控大局。事件發生前全球市場已收市，所以確定性仍未反映出來，今日早上除咗睇股市升跌外，仲要睇住美元走勢，係咪有避險錢流入，始終美元升，對股市都唔係好。

歐美最新嘅採購經理指數維持喺盛衰分界線下，英國突然加息50點子，令市場繼續游走在驚衰退同持續加息之間，美股上周五回落，道指又重回34000點之下，納指由高位回了400點，結束連升8星期走勢，但今年已累升咗38％，未來亦可能要面對上星期提到摩通預期嘅傳統基金減持股票嘅情況。

上星期五VIX指數仍低企13.44，市場避險情緒未有升溫，但投資者入市意慾則下降，衰退陰影揮不去，加上中國經濟開關後未貫徹地向好，國際油價走軟，紐約期油70美元下徘徊，其他資源價格和資源股都偏軟。

美匯102.87，英鎊回到1.271，美元兌日圓升上143.7，遊日又可以換平YEN，人民幣7.21，繼續冇起色。