港股端午假期前裂囗跌穿19500後就反覆向下跌，中午判斷指數冇能力喺19300守得穩，出現單日轉向，都跟隨預定先行離場。預先設定19500位置既然失守，就要跟計劃行，睇錯市喇！要為跌市搵借囗，都係後話，當然人民幣日中升到上7.2關囗，直逼而去年第四季人仔曾低見7.35，衝擊係一定有，上證A股又返到3200水平，中港股市喺呢一輪人民幣跌浪中一直企得穩，依家一下子追回跌幅，周初預期會出現調整，原因係講好嘅有組合拳政策未見蹤影，依家總理仲喺歐洲到訪中，可能今個星期都唔會出現，喺期望落空或延後下，調整喺正常，只係幅度比預期大，恒指依家水平接近20天線位置，但周線已跌破上星期低位19255，周線破底係唔好形態，除非今日上番19300上，短期內盡快重上19500，就仍然可當過度調整咁睇，否則應停一停，睇一睇。

科指則好少少，上周低位3895仍未穿，但外圍走軟，夜期下跌，難講守得住。大科技股大多只得20天線可守，騰訊（700）喺335元、美團（3690）125元、巴巴（9988）喺83元。藥明（2269）急插一日後並未止跌，收市再跌一元，藥明同分析員開會，透露盈利進入低增長期，臨床前測試亦輕微減少，記得冇幾耐之前南韓三星生物攞到美國輝瑞約4億美元嘅合作恊議，以依家保護主義同中美關係前題下，藥明再得到歐美大藥廠研發項目機會相應減少，前景憂慮下，股價跌合理。但唯一覺得有問題嘅係公司喺分析員會議發出股價敏感訊息，而唔係喺港交所網頁公佈，略嫌有先後唔公平嘅情況。記得嗰日約一時半後股價突然急跌，當然有好多機構性投資者得知會議資訊後紛紛掟貨，而其他散戶多數唔知發生咗咩事，收市後知道股價已跌咗17％。

聯儲局主席鮑威爾在聽證會堅持通脹目標2％不變，未來以溫和步伐加息是最適當嘅做法，估計聯儲局會見到核心通脹數字回落才會放棄較鷹的言論，現時市場預期下月加息25點子機率為75％。

繼貝萊德後，市場憧憬更多金融機構涉足加密貨幣市場，比特幣突破30000美元。