噚日亞洲區時段，美期走軟，內地下調LPR只下跌0.1厘，同市場期望下調幅度有落差，離岸人民幣又抽到上7.18，前日港股尾市回升都只係阿林肯見到主席，借勢挾一下，相信調整未完，大市今個月累升2000點，先預調整500點正常不過，恒指噚日一開就再慢慢跌落去，下午終於試到19500支持，收番上19607，全日跌306點，成交只得944億元。

恒指10周線19583，50周線19466，都係圍繞住19500呢個大位，係咪表示立即見底，我冇水晶球。如果有如預期喺19600先開始入市，穿19500就走，成本100點。恒指今個升浪除咗升穿19500阻力外，亦都升破自22700拉落嚟嘅下降阻力，當時喺19600，依家落到19300水平，阻力變支持理論下，恒指有權回到該支持位，考驗反彈再上，如果都跌穿呢個位，升浪就有問題，所以願唔願意捱呢200點就係個人成本嘅取捨。

噚日科技股繼續成為沽售對象，京東（9618）同美團（3690）各跌3％，快手（1024）中咗第一個支持位56元，低見56.1，AI概念股份相對跌幅較少。中特估未見有起色，其他板塊中，生科股表現反覆，雲頂（1952）升27％，四日累計已升67％，公司冇任何消息，反而藥明（2269）下午好似洗倉咁，單日跌17％，又係冇特別消息，只見有分析員引述公司指今年上半年盈利或持平。藥明急跌，其他生科股都冇運行，尤其係做藥物研發嘅。

巴巴（9988）噚日只跌1.5％，相對其他科技股算強，前晚有消息話現任主席張勇將會9月退位，轉任阿里雲董事長同CEO，而接任阿里主席一職為蔡崇信。張勇一直係阿里舵手，撐管阿里所有業務，之前天猫係一個唔成功項目，張勇接手後天猫成功殺出，論執行力，市場都覺得張勇比蔡先生更強。蔡先生係現任集團副主席，佢亦係美國NBA球隊新澤西藍網嘅班主，球隊表現平平，平時較少沾手阿里集團運作，係咪主席適當人選就要時間引證。馬老師周遊列國後，近日返回杭州，對集團員工都表示現時內地經濟下行同信心不足仍會繼續，未來機遇可能會喺淘寶，而唔係較高端嘅天猫，以往成功嘅方法已唔合時，要再行新方向。近期618活動已完結，都冇公佈咩銷售數字，估計數字並唔理想。據說有唔少參與商都加大補貼希望谷銷售，結果事與願違，更拖低整體盈利。阿里今次作出嘅人事變動可能反映隻團系內業務中，阿里雲是係最值得憧憬，所以要張勇擔大旗，未來若阿里真係搞分拆，阿里雲就可以多加留意。

蔚來（9966）獲阿布扎比政府嘅投資主體CYVN以每股8.72美元買入約7％的A類普通新股。

美股假後繼續調整，道指由跌400點收窄至250點，納指微跌23點。反而中概股指數跌得仲多，金龍指數跌近5％，好多股份比噚日香港收市更跌突，巴巴跌到86港元，京東（9618）146港元，亦拖累夜期再跌260點，今日恒指會正式測試前下降阻力變支持嘅位置。

美匯102.54，英鎊失守1.28，人民幣7.18，繼續尋底。