布林肯如期到中國訪問，據新聞片段見，接機同會面都並非高級數嘅接見。布林肯先後同秦剛、王毅見面，大家各自表述，中國最關注嘅兩大議題就係無理打壓同中台問題由中國自主處理，當然太多問題唔會短期可解決，但肯見面溝通一定會比隔空打囗水戰有建設性得多。最後布林肯獲習主席接見，估計會談應該有進展，所以國家主席先會肯接見。

中港股市如預期回吐，布林肯嚟咗，人民幣雙櫃檯噚日出咗台，而憧憬嘅救經濟組合拳就未見有出現，人民幣噚日朝早由7.12拉到上7.16，港股借勢調整，恒指低見19720，跌逾300點，尾市習布會面消息公佈。恒指跌幅收窄到127點，收19912，成交縮至千億。科指跌50點，騰訊（700）、美團（3690）最多跌3％，噚日已講幾隻大股已升近短期阻力，回吐係正常，快手（1024）已連跌兩日，下面56同埋54元係兩個大位，如果搏佢最早完成調整，可睇實呢兩個位。其他板塊未見有輪動情況，叫做好啲只見有中移動（941）同部份資源股，內房股喺冇新政策下都腳軟。

恒指噚日尾市後抽，係咪一日就完成調整，個人相信機會不大，今個星期只四日市，再下試19500至19600支持機會仍在。人民幣雙櫃首日成交稀疏，只得騰訊（80700）同中移動（80941）成交多少少，合共都只得9000萬， 如果目標只放喺方便內地資金可免轉港幣，則雙櫃檯對港股成交幫助不大。

美國噚晚假期休市，美期暫跌100點，納期跌20點，現貨金1963美元，跌8美元。美匯102.49，日圓142，歐元1.093，人民幣今早徘徊在7.16水平。