美國最新公佈嘅消費者信心指數63.9，高於預期嘅60，儲局官員繼續放鷹，指應繼續加息，希望可以壓到消費者意欲，不過股市繼續上升，畀投資者帶嚟額外財富，部份轉頭又投入消費市場。通脹整體回落，但核心通脹問題包括住屋、租金同食物未有顯著回落。美國要強美元，眼見中國為救經濟暫時犧牲人仔匯價，降低中短期嘅信貸便利，至於傳聞話周末會公佈嘅多方面救市組合拳，到噚晚仍未見有着落。美匯近期已走軟，借中國鬆一鬆下，繼續再囗頭鷹，令人仔低走，方便向中國輸出通脹，亦方便維持強美元多一段時間，因為只要下年開始減息，同低息貨幣國家息差就會收窄，到時如果日圓等匯價就會反彈。

摩通前幾日有報告指出，環球大型基金包括部份主權基金同退休養老基金會重整旗下投資組合，未來數周可能會在環球股票市場沽出約1,500億美元，原因係呢啲基金嘅投資規範都係約60％股票、40％債劵，第二季環球股市做好（當然唔計中港股市)，股票佔比上升咗，就要沽出部份股票去降低比率，當中日本基金、挪威石油基金同瑞士央行估計合共要沽出660億元，摩通估計事件會對環球市場有3至5％影響。

上星期五美股四巫結算日，先升後回，屬正常調整，係咪似摩通估計因市場調整組合而導致下跌就要再觀察。美匯102.3，英鎊升上1.28，日圓直逼142，人民幣7.128。

港股上周進一步上升，去到100天線（20163）初遇阻力，港股已連續三周陽燭向上，早前講恒指接近17700會隨時見底，如果確認跌穿則牛三未必出現，結果前者發生了，如果確認今年低位已見，則以牛一量度升幅8000點計，恒指下一升浪最牛係26000點。當然呢個係中長線目標，短線20600阻力都好大，展望今周港股或會出現調整，19500乃短期重要支持。個個別板塊中，科技股升幅不少，上望空間不大，百度（9888）已接近148阻力位，而一直行得最前嘅快手（1024）上星期亦率先回落，依家係要睇如果大市調整時資金係咪會轉向另外板塊尋寶。