噚日國家公佈嘅三頭馬車經濟數據，固投、工業生產同零售數字，結果固投按年升4％，工業生產升3.5％，零售升12.7％，三者都比預期差，而預期比上月數值已經調低咗，所以國內經濟係差，數據上升只因去年封關下基數低，同上月比較應該下跌。數據公佈後，國內股市跌一跌後立即反彈，話布林肯訪華又好，數據差政府會有措施扶持經濟又好，只係為升市搵理由，深成指升1.8％，深圳創業板升3.5％，科技股全面做好，連帶上證午後都被帶起，升24點至3252，上星期話衝穿3245很大機會轉勢，守得住可向上再行。

一直都相信港股未出轉勢訊號係唔可以做淡，結果後抽一日承科技股大爆發下終於升一枝大陽燭突破50同250天線，成交增至1200億元，依家就算出現調整只可以逢低買，幾經艱苦重上19500，如果是升市就唔應該再失守，呢個係短線最後防線，若確認失守就要先離場再思考。

幾大科技股都一囗氣衝穿50天線，積弱嘅美團（3690）大升10元，升幅7％，京東（9618）升5％，二線科技股都接力上，微盟（2013）已經喺4.3樓上沽出一半，餘下等見唔見到4.5元。電車股繼續由比亞廸（1211）同理想（2015）領漲，其他升幅暫跟唔上。內需股弱咗好耐，盛傳有國策支持下炒上，市傳京東618網購銷情最好係李寧（2331），第二是Nike，第三先係安踏（2020）。

噚日人民幣朝早曾經跌到7.19，港股收市時為7.165。噚晚大幅反彈，最新報7.122，而美匯繼續偏軟，現為102.12，非美貨幣全面升，歐元升穿1.095，英鎊1.279，澳元0.688，日圓最弱，企140水平，今日到日本史行開會。

美股三大指數上升1.1％，聯儲局會議後鮑威爾竟然話美國經濟已唔存在硬着陸同軟着陸，衰退未見出現，而且仲喺度增長緊，想知真假？下個月中後美企公佈第二季業績表現就可知一二。

ADR中資股指數上升，巴巴ADR價較噚日港股收市再升1%，而黑期則升上19920。