中國今日會公佈三頭馬車嘅固投、工業生產同零售數據，預期都係差，所以國內股市噚日抽一抽，午後都打回原形，就算傳話國家會有新措施扶持經濟，但對個市刺激有限，繼續近期低位橫行，況且上兩個月出數據後個市都係向下走，市場會有顧慮。

港股就開高低收，恒指衝穿下降阻力19550後企唔夠半日就回落，結果全日跌113點，收19408，成交繼續維持喺千億之下。指數一直升到大位嗰吓遇到阻力好正常，市場上大多人一直看淡，所在去到大位一定會有人沽貨或搏到位，累升咗1500點，噚日只跌百點不足以斷定升浪已完，指數仍在上升軌跡中。10天（19164）線啱啱升穿20天 （19137）天線，最低限度要跌穿今個星期低位19255，令周線扭轉，短炒就要開始小心，如果10天同20天線都失守，則短期反彈完成機會就較大，現時只可以當做升後回吐。

科指先升後回，幾大科技股埋單接近冇起跌，阿爺減信貸便利，銀行股受壓，內房股收市又打回原形，市場對新政策期望同信心未必好大，成個板塊問題太大，民企內房大多都違約，債主唔會放過你。Tesla強勢繼續支撐着幾隻電車股。

布林肯終於落實三日後訪華兩日，而中美雙方都確認咗，如果話中美破冰就諗太多喇，未惡化已經係好事。近來已有好多政商兩界猛人先後訪華，隨歐洲多國總統同高官外，繼後有Elon Musk，依家又有Bill Gates，仲會見國家主席，可見各方都重視國內市場。

聯儲局如預期維持息口不變，但點陣圖就話預期利率要去到5.6厘，即要加多50點子，而減息更加唔要想呢，咁點解今次又不加呢。放鷹放到咁，市場比面都要跌一跌，道指由升轉跌400點，收市收窄至232點，科技股強，晶片帶動下仍有50點進帳。

聯儲局放鷹下美匯都上不到，回到103，歐元升穿1.08，日圓140，而人民幣仍在低位7.17。