美股科技股成為近期嘅焦點板塊，AI仲係風囗位，大家追入產業鏈中嘅相關股份，只係近期美國有分析資金流嘅報告指，科技股有資金流出，反而見散戶接貨情況，而納指亦見有少少頂背馳情況出現，慎防有回吐。

國內股市延續日前走勢，深成指同創業板升，上證A股橫行，市場炒落後追捧落後嘅科技股。

噚日朝早人民幣開市前又向下插，最低見7.177，港股早段都只跌百幾點，午後又再開車，今次升穿19500收，成交多至千億元，繼續矮仔上樓梯，跟國內股市一樣，科技股由頭強到尾，而中特估、金特估除平保

（2318）同人壽（2628）之外，大部份走軟。午後彭博又話有消息指國家正研究新一輪組合拳，包括刺激內房內需等十幾項措施，或會考慮減息，暫未能證實。另外噚日人行意外降低7天逆回購利率，增加市場對聽日中期信貸便利下調嘅預期，而噚晚亦率先下調常備借貸便利（SLF）10個點子。

科技股做好，尤其涉及人工智能股份，百度（9888）升5％、商湯（020）升7％，另外見二、三線有AI、雲概念股份升幅較大，明源雲（909）升16％、醫渡（2158）升12％，市場風險胃納似有所提升。硬件股亦炒到聯想（992）同萬國數據（9698）。噚日提到微盟（2013）升3％，技術上出現咗突破，低位有買到嘅可4.3元先沽一半，下一目標為50天線4.52，而止蝕位則上移至3.97元。內房下午受國策傳聞下拉升，其他板塊中，生科醫藥算係最差一環，一直低位徘徊，要睇吓國策係咪會有照顧呢個板塊，板塊中，康方（9926）同信達（1801）都會係首選對象。

美國5月CPI按年升4％，比預期4.1%更低，核心升5.3％，同預期一樣，住屋同租金仍然高企。通脹降温下聯儲局都應有借囗停一停，只係歐央行話會繼續加息下會有多少壓力。

美股繼續向上，納指再升111點，Nvidia上到410美元，兩星期前認為佢有機會跌穿366美元，證實看錯咗。

美匯103.3，日圓140，英鎊繼續強，升上1.26，人民幣7.173。紐約期油反彈上69美元。