踏入月中，又開始有數據公佈，今晚美國會有5月CPI，預期低至4.1％，預期咁低，公佈數字如果符預期或較預期低，即係今個星期聯儲局應該唔會再加息，而核心CPI預期為5.3％。聯儲局周中開會，星期三深夜就會有結果。而星期四就到中國公佈上月嘅固投、工業生產同零售數字，亦都係國家一直催谷嘅經濟板塊，4月三大數據都係差，而市場預期5月亦都會較前值下跌。

國內股市低位橫行，上證3200點保衛戰未分勝負，暫在上方橫行，最好盡快升穿3245。深成指同創業板做好，上周低位開十字星回升，深成指升，希望有助港股。

港股成交只800億，細成交下個個都話要做空恒指，又要做空港交所（388），話個市冇力，十個牛皮九個淡，結果佢都係唔肯跌，噚日早段下跌，未到20天線就回升，結果倒升14點，上面條阻力線過一日又低咗，今日已去到19530。現水平我並唔係大好友，只小注順勢而行，要做淡起碼要有轉勢跡象才考慮，跌穿20天線就要開始小心。恒指未有方向，但科指就較好，兩個禮拜前話科指必需盡快回升上3750先有救，結果佢做到，上周仲升穿今年高位4825落嚟嘅下降阻力，噚日再升40點，動力明顯比恒指強，希望科技股可為港股帶嚟啲生氣。科技股中快手（1024）升2％最靚，二線的可留意微盟（2013），公司上月公佈首季各項收入都快速恢復，而且會喺今季繼續提升，股價已做咗個大圓底，穿3.9元止蝕，如果科技股係炒，可小注一搏。

美股在數據和議息前繼續上，道指升189點，納指升202點，中概股嘅金龍指數就冇起跌，跟唔到美股上，恒指夜期都反覆偏軟。

高盛唱淡油價，紐約期油跌至67美元，美匯橫行，最新103.63，人民幣7.155，又跌多少少，難怪金龍指數和夜期都彈吾起。