美股沿着高位行，三大指數上周五升幅都在尾段收窄至0.1％左右，今周美國會議息，最新利率期貨顯示加25點子機會暫有三成，停一停諗一諗都係好。道指又差唔多上到34000點附近嘅阻力位，納指就繼續慢上，衝穿13181後未肯回頭，但圖表看動力好似有啲放緩，要小心啲，最怕係若然今個星期唔加息，會有好消息出貨，暫時只睇短期調整。

Tesla 連升11日，自Elon Musk去中國後股價一直向上，且好消息不斷，繼褔特後，通用汽車都加入佢嘅充電網絡，一係證明Tesla嘅充電網絡已非常成熟，覆蓋範圍廣，二係如果各家生產商自研一個屬於自己嘅生態圈，成本一定好大，無論企業用家都係雙輸，所以估計未來會出現一體化嘅充電制式，而大家競爭嘅只係汽車性能同價格。

美匯103.55，英鎊高企1.256，人民幣弱方徘徊，最新報7.145，紐約期油70美元。比特幣25700美元，幣安同coinbase被算帳，自家貨幣跌，對比特幣同以太幣暫影響不大。

港股上周繼續造好，恒指以接近全周高位收，繼續細成交下慢升格局，上升下冇太多資金追入，或者講係冇錢敢高追，當然沽壓亦唔大，連明星新股都因為成交少，認購不足而宣佈暫時擱置上市計劃。北水都放棄玩個股，近一個星期都係集中買賣盈富基金(2800)等ETF炒上落，個股參與率極低。恒指今個月開18190，最高19463，差唔多升咗1300點，勉強滿足每月最少波幅嘅目標。指數連續兩日收喺20天線上，10天線亦開始回升，正常成交下一定繼續看上，上面最大阻力喺今年嘅下降軌19600水平。

蔚來（9866）今年首季股東應佔虧損48.04億元人民幣，每股虧損2.91元，去年同期股東應佔虧損18.25億元。因市場競爭激烈，毛利率下跌，新車銷售遜預期，今年底未能達至收支平衡，隨着高楷產品開始下半年交付，希望可提升毛利率，下年中達至收支平衡。